गणेशोत्सवासाठी कोकणात जाणाऱ्या चाकरमान्यांची वाढती गर्दी लक्षात घेऊन महाराष्ट्र राज्य मार्ग परिवहन महामंडळाने विशेष बसफेऱ्यांचे नियोजन केले आहे. त्याअंतर्गत अलिबाग ते सावंतवाडी विशेष एसटी बसफेरी १२ सप्टेंबर २०२६ रोजी सकाळी ७ वाजता अलिबाग बसस्थानकातून रवाना होणार आहे. ही बस वडखळ, नागोठणे, कोलाड, इंदापूर, माणगाव, महाड, पोलादपूर, चिपळूण, संगमेश्वर, लांजा, राजापूर, कणकवली आणि कुडाळमार्गे सावंतवाडीला पोहोचणार आहे.
गणेशोत्सवाच्या पार्श्वभूमीवर मुंबई, ठाणे, नवी मुंबईसह राज्याच्या विविध भागांतून मोठ्या संख्येने चाकरमानी कोकणातील गावी रवाना होत आहेत. त्यामुळे रेल्वे, खासगी वाहने आणि नियमित एसटी सेवांवर मोठा ताण येत आहे. या पार्श्वभूमीवर अलिबाग–सावंतवाडी विशेष बससेवेमुळे रायगडसह रत्नागिरी आणि सिंधुदुर्ग जिल्ह्यातील प्रवाशांना थेट आणि सोयीस्कर प्रवासाचा पर्याय उपलब्ध होणार आहे. विशेषतः कुटुंबासह गणेशोत्सवासाठी गावी जाणाऱ्या प्रवाशांना या सेवेचा लाभ मिळणार आहे.
दरम्यान, गणेशोत्सव काळात मुंबई-गोवा महामार्गावर वाहनांची मोठी गर्दी होण्याची शक्यता असल्याने खासगी वाहनांच्या प्रवासाला विलंब होऊ शकतो. अशा परिस्थितीत एसटीची विशेष बससेवा सुरक्षित आणि विश्वासार्ह पर्याय ठरणार आहे.
या विशेष फेरीला चाकरमान्यांकडून चांगला प्रतिसाद मिळण्याची अपेक्षा असून, रायगडसह दक्षिण कोकणात जाणाऱ्या गणेशभक्तांना यामुळे मोठा दिलासा मिळणार आहे.
