जमिनीची फेरफार नोंद मंजूर करण्यासाठी कडाव (ता. कर्जत, रायगड)मंडळाचे मंडल अधिकारी चंद्रकांत ठकाजी केंडे (रा. नित्य चंद्रदर्शन हाऊसिंग सोसायटी, नागोठणे, तालुका रोहा, जिल्हा रायगड), मंडळ अधिकारी कडाव याला एक लाख रुपयांची लाच स्वीकारताना रायगड येथील लाचलुचपत प्रतिबंधक विभागाच्या पथकाने रंगेहाथ पकडले.लाच लुचपत प्रतिबंधक विभागाच्या कारवाईत नवीन वर्षाच्या सुरवातीलाच लाच घेताना महसूल विभागाचा अधिकारी जाळ्यात सापडला आहे.
कर्जत तालुक्यातील कडाव येथील मंडळ अधिकारी चंद्रकांत ठकाजी केंडे यांना एक लाख रुपयांची लाच घेताना लाचलुचपत प्रतिबंधक विभागाने रंगेहाथ पकडले आहे. केंडे यांनी तक्रारदार यांचेकडे जमिनीची फेरफार नोंद मंजूर करण्याकरिता एक लाख रुपयांची मागणी केली होती. दरम्यान हे पैसे घेताना लाचलुचपत प्रतिबंधक विभागाने बुधवार, दि. ८ जानेवारी रोजी त्यांना रंगेहाथ पकडले.
यातील तक्रारदार यांना अत्यारपत्र दिलेल्या इसमाचे मौजे दहिगाव तालुका कर्जत येथे नोंदणीकृत कराराद्वारे खरेदी केलेले जमिनीचे फेरफार नोंद मंजूर करण्याकरिता दि. 31/12/2024 रोजी तक्रारदार यांचेकडे आरोपी लोकसेवक चंद्रकांत ठकाजी केंडे (रा. नित्य चंद्रदर्शन हाऊसिंग सोसायटी, नागोठणे, तालुका रोहा, जिल्हा रायगड), मंडळ अधिकारी कडाव यांनी 1 लाख रुपये लाचेच्या रकमेची मागणी केल्याची तक्रार दि. 7/1/2025 रोजी लाच लुचपत प्रतिबंध विभागाकडे केली होती.
सदर तक्रारीच्या अनुषंगाने दि. 8/1/2025 रोजी करण्यात आलेल्या पडताळणी दरम्यान आरोपी लोकसेवक चंद्रकांत ठाकाजी केंडे यांनी तक्रारदार यांचेकडे जमिनीची फेरफार नोंद मंजूर करण्याकरिता एक लाख रुपये लाचेच्या रकमेची मागणी केल्याचे निष्पन्न झाले. त्यानुसार दि. 8/1/2025 रोजी करण्यात आलेल्या सापळा कार्यवाही दरम्यान मंडळ अधिकारी चंद्रकांत ठकाजी केंडे यांनी तक्रारदार यांचेकडून मागणी केलेली लाचेची रक्कम तक्रारदार यांचेकडून स्वीकारताना स्वीकारताना त्यांना रंगेहात पकडून ताब्यात घेण्यात आले आहे.
सदरची कारवाई लाचलुचपत प्रतिबंधक विभाग रायगडचे पोलीस उप अधीक्षक शशीकांत पाडावे यांच्या मार्गदर्शनाखाली सहाय्यक फौजदार विनोद जाधव, सहाय्यक फौजदार अरुण करकरे, पोलीस हवालदार महेश पाटील, पोलीस हवालदार सचिन आटपाडकर, सागर पाटील यांनी केली. या प्रकरणी कर्जत पोलीस ठाण्यात गुन्हा दाखल करण्यात आला असून या कारवाईने महसूल क्षेत्रात खळबळ उडाली आहे.
रायगड जिल्ह्यातील सर्व नागरिकांना आवाहन करण्यात येते की, त्यांच्याकडे कोणत्याही शासकीय अधिकारी/कर्मचारी यांनी किंवा त्यांच्यावतीने खाजगी इसम (एजेंट) कोणतेही शासकीय काम करून देण्यासाठी कायदेशीर फी व्यतिरिक्त अन्य लाचेची मागणी करीत असल्यास तात्काळ लाचलुचपत प्रतिबंधक विभाग रायगड अलिबाग कार्यालय दुरध्वनी (02141-222331)/ टोल फ्रि क्र. 1064 या क्रमांकावर संपर्क साधण्याचे आवाहन रायगड जिल्ह्याचे लाच लुचपत प्रतिबंधक विभागाचे उपअधीक्षक शशिकांत पाडावे यांनी केले आहे.
