माथेरांकरांना पर्यायी व्यवस्थेची नितांत गरज !

 माथेरान ( मुकुंद रांजाणे ) :

माथेरानला येण्यासाठी आजही नेरळ मार्गे माथेरान याच एकमेव मार्गावर अवलंबून राहावे लागत असल्याने अनेकदा याच मार्गाचा अवलंब करून परिसरातील लोक त्यांच्या हक्काच्या रास्त मागणीसाठी नेरळ माथेरान ह्या घाटमार्गावर रास्ता रोको करत असतात याचा परिणाम इथल्या पर्यटनावर होत असतो.माथेरानला येण्यासाठी अन्य पर्यायी व्यवस्था उपलब्ध होऊ शकते त्यासाठी शासनाने ठोस उपाययोजना करणे गरजेचे असल्याचे मत स्थानिक नागरिक करत आहेत.

कर्जत भूतीवली मार्गे माथेरानला येण्यासाठी रोपवे सारखा महत्वकांकक्षी प्रकल्प प्रलंबित आहे.त्यावेळेस तत्कालीन उपमुख्यमंत्री छगन भुजबळ यांनी माथेरान भेटीदरम्यान रोपवे प्रकल्प सुरू होईल असे नागरिकांना आश्वासीत केले होते परंतु पर्यावरण वाद्यांच्या काही जाचक अटींमुळे हा प्रकल्प लांबणीवर गेला आहे.

पनवेल-धोदाणी मार्गे माथेरान असा एमएमआरडीए च्या माध्यमातून मार्गी लागणाऱ्या फिनिक्युलर रेल्वेच्या व्यवस्थेस सुध्दा मतांच्या राजकारणापायी तालुक्यातील आमदारांनी त्यावेळेस विरोध दर्शविला होता त्यामुळे हा प्रकल्प सुध्दा लाल फितीत अडकून पडला आहे.

तिसरा पर्यायी मार्ग म्हणजे कर्जत चौक येथून रामबाग पॉईंट मार्गे माथेरान हा रस्ता सुध्दा अगदी जवळचा असून याच मार्गाने त्याकाळी माथेरानचा शोध लावणारे ठाण्याचे तत्कालीन जिल्हाधिकारी सर ह्युज मॅलेट यांनी १८५० मध्ये दगडी पायवाट केली होती ती आजही शाबूत आहे. हा पर्यायी मार्ग सुध्दा माथेरानशी जोडला जाऊ शकतो.

२६ जुलैच्या अतिवृष्टीमुळे माथेरानच्या घाटरस्त्यात मोठया प्रमाणावर दरडी कोसळून हा मार्ग बंद झाला होता तर मिनिट्रेनचा मार्ग सुध्दा वाहून गेल्याने दोन वर्षे ट्रेनची सेवा बंद करण्यात आली होती. त्यावेळी स्थानिकांचा जगाशी संपर्क तुटला होता. नेरळ ते माथेरान ह्या एकाच मार्गामुळे स्थानिकांना नेहमीच वेठीस धरले जाते. त्यासाठी आमच्या हक्काचा पर्यायी मार्ग शासनाने आम्हाला देऊन इथे पर्यटन क्रांती घडवून आणावी अशी आर्त साद सर्वत्र ऐकू येत आहे.

——————————————————-

 मतांचे राजकारण

माथेरान मधील एकूण मतदार संख्या जेमतेम साडेतीन हजारांच्या आसपास असल्याने आपल्या पक्षाला सातशे ते आठशे मते मिळणार त्यामुळे आजवरच्या कार्यकाळात कोणत्याही आमदार असो किंवा खासदार असो यांनी प्रांजळपणे प्रयत्न केले नाहीत. माथेरानला पर्यायी व्यवस्था उपलब्ध झाल्यास आपल्या व्यवसायावर परिणाम होईल अशी भीती व्यक्त करत परिसरातील लोकांनी नेहमीच इथल्या विकास कामांना लोकप्रतिनिधीमार्फत विरोध केला आहे.

——————————————————

पर्यायी मार्गाचे फायदे

मुंबईच्या पर्यटकांना माथेरान प्रवास अत्यंत जवळ आणि सोयीस्कर ठरू शकतो. पर्यटनात वाढ होऊन स्थानिकांसह परिसरातील लोकांच्या व्यवसायात भर पडेल. आजही परिसरातील  जवळपास पंचवीस हजार लोक माथेरानवर आपली उपजीविका भागवत आहेत.

—————————————————–