भारतीय रेल्वेत सरकारी नोकरी मिळवण्याचे स्वप्न पाहणाऱ्या तरुण-तरुणींसाठी मोठी आनंदाची बातमी समोर आली आहे. Railway Recruitment Board अर्थात रेल्वे भरती बोर्डाने टेक्निशियन (तंत्रज्ञ) पदांसाठी तब्बल ६,५६५ रिक्त जागांची मेगाभरती जाहीर केली आहे. देशभरातील विविध रेल्वे झोनमध्ये ही भरती प्रक्रिया राबवण्यात येणार असून इच्छुक उमेदवारांना ३० जून २०२६ पासून ऑनलाईन अर्ज करता येणार आहेत.
‘CEN 02/2026’ अंतर्गत होणाऱ्या या भरतीमध्ये टेक्निशियन ग्रेड-१ (सिग्नल) साठी ३२३ जागा तर टेक्निशियन ग्रेड-३ साठी ६,२४२ जागा उपलब्ध आहेत. मध्य रेल्वे (मुंबई), दक्षिण रेल्वे (चेन्नई), उत्तर रेल्वे (नवी दिल्ली) आणि पूर्वोत्तर सीमांत रेल्वे या विभागांमध्ये मोठ्या प्रमाणावर भरती होणार आहे. या भरतीचे सविस्तर अधिसूचना २९ जून २०२६ रोजी प्रसिद्ध करण्यात येणार असून त्यामध्ये परीक्षा पद्धत, शुल्क, आरक्षण आणि इतर नियमांची माहिती दिली जाणार आहे.
उमेदवारांनी मान्यताप्राप्त संस्थेतून दहावी उत्तीर्ण असणे आवश्यक असून संबंधित ट्रेडमधील ITI किंवा अॅक्ट अॅप्रेंटिसशिप पूर्ण केलेली असावी. टेक्निशियन ग्रेड-१ (सिग्नल) पदासाठी इंजिनिअरिंग डिप्लोमा किंवा पदवीधारक उमेदवारही पात्र असतील. उमेदवारांचे किमान वय १८ वर्षे असावे. ग्रेड-१ साठी कमाल वयोमर्यादा ३३ वर्षे तर ग्रेड-३ साठी ३० वर्षे निश्चित करण्यात आली आहे.
अर्ज प्रक्रिया पूर्णपणे ऑनलाईन असणार असून उमेदवारांना rrbapply.gov.in या अधिकृत संकेतस्थळावर जाऊन नोंदणी करावी लागणार आहे. अर्ज करण्याची अंतिम तारीख २९ जुलै २०२६ ठेवण्यात आली आहे.
अर्ज प्रक्रिया पूर्णपणे ऑनलाईन असून उमेदवारांनी खालील पायऱ्यांचे पालन करावे:
१. सर्वप्रथम रेल्वे भरती बोर्डाच्या अधिकृत संकेतस्थळाला rrbapply.gov.in भेट द्या. २. होम पेजवर उपलब्ध असलेल्या ‘RRB Technician Recruitment’ च्या लिंकवर क्लिक करा. ३. तुमचे नाव, मोबाईल नंबर, ईमेल आयडी आणि ओळखपत्राचा तपशील भरून नवीन नोंदणी (Registration) करा. ४. नोंदणी झाल्यानंतर मिळालेल्या आयडी आणि पासवर्डचा वापर करून लॉगिन करा. ५. आपली शैक्षणिक माहिती, वैयक्तिक तपशील आणि प्रवर्ग काळजीपूर्वक भरा. ६. आवश्यक असलेली कागदपत्रे, फोटो आणि स्वाक्षरी योग्य स्वरूपात अपलोड करा. ७. उपलब्ध असलेल्या ऑनलाईन पर्यायांद्वारे अर्ज फी जमा करा. ८. संपूर्ण फॉर्म तपासून ‘Submit’ करा आणि भविष्यातील संदर्भासाठी अर्जाची प्रिंट काढून ठेवा.
