मुंबई : महाराष्ट्र नवनिर्माण सेनेचे अध्यक्ष राज ठाकरे आणि उद्धव ठाकरेंच्या शिवसेनेने नीट परीक्षा, विद्यार्थ्यांवरील अन्याय आणि केंद्र सरकारच्या भूमिकेविरोधात 26 जुलै रोजी मुंबईत संयुक्त शक्तीप्रदर्शन मोर्चा काढण्याची घोषणा केली आहे. शिवाजी पार्क ते सिद्धीविनायक मंदिर असा हा मोर्चा निघणार असून सरकारला सद्बुद्धी देण्यासाठी देवाला साकडे घालून मोर्चाची सांगता करण्यात येणार असल्याचे राज ठाकरे यांनी संयुक्त पत्रकार परिषदेत सांगितले.
राज ठाकरे यांनी पत्रकार परिषदेत केंद्र सरकारवर आणि पंतप्रधान नरेंद्र मोदी यांच्यावर टीका करताना, पदासोबत अपयशाची जबाबदारीही स्वीकारली पाहिजे, असे स्पष्ट केले. नीट परीक्षेतील कथित गैरव्यवहार, प्रश्नपत्रिका फुटीचे प्रकार आणि विद्यार्थ्यांवर होत असलेल्या अन्यायामुळे देशभर संतापाची लाट उसळल्याचे त्यांनी सांगितले. विद्यार्थ्यांच्या भावना समजून घेण्याऐवजी सरकारकडून आंदोलनांकडे दुर्लक्ष केले जात आहे. शेतकरी आंदोलनापासून मणिपूरपर्यंत सरकारची भूमिका ही दडपशाहीची राहिली आहे, अशी टीकाही त्यांनी केली.
मोर्चाची माहिती देताना राज ठाकरे म्हणाले की, 26 जुलै रोजी सकाळी 10 वाजता शिवाजी पार्क येथे विद्यार्थी, पालक आणि नागरिकांनी एकत्र जमावे. सकाळी सुमारे 11.30 वाजता मोर्चाला सुरुवात होईल. शिवाजी पार्क ते सिद्धीविनायक मंदिर असा हा मोर्चा निघणार असून, सरकारला सद्बुद्धी मिळावी आणि विद्यार्थ्यांना न्याय मिळावा, यासाठी देवाला साकडे घालून मोर्चाची सांगता करण्यात येणार असल्याचे त्यांनी सांगितले. या आंदोलनातून विद्यार्थ्यांचा आणि पालकांचा संताप केंद्र सरकारपर्यंत पोहोचवण्याचा प्रयत्न केला जाणार असल्याचेही त्यांनी स्पष्ट केले.
