कोकणात नैऋत्य मान्सूनचे आगमन होऊनही अद्याप अपेक्षित दमदार पावसाने हजेरी लावलेली नाही. भारतीय हवामान विभागाने पुढील काही दिवस कोकण-गोव्यात तुरळक ते मध्यम स्वरूपाच्या पावसाचा अंदाज व्यक्त केला असून काही ठिकाणी मेघगर्जनेसह ताशी ४० ते ५० किलोमीटर वेगाने वारे वाहण्याची शक्यता वर्तवली आहे.
हवामान विभागाच्या १४ जूनच्या प्रसिद्धीपत्रकानुसार, महाराष्ट्रात मान्सूनच्या पुढील प्रगतीसाठी वातावरण अनुकूल असून येत्या चार ते पाच दिवसांत राज्यातील आणखी काही भागांमध्ये मान्सून सक्रिय होण्याची शक्यता आहे. १४ ते २० जूनदरम्यान कोकण-गोव्यात विखुरलेल्या स्वरूपाचा पाऊस अपेक्षित असून १४ आणि १६ जून रोजी मेघगर्जना, विजांचा कडकडाट आणि जोरदार वाऱ्यांचा इशारा देण्यात आला आहे.
दरम्यान, १४ ते १७ जूनदरम्यान कोकणात उष्ण व दमट हवामान कायम राहण्याची शक्यता हवामान विभागाने व्यक्त केली आहे. मान्सूनच्या पुढील वाटचालीसाठी परिस्थिती पोषक असल्याने येत्या काही दिवसांत पावसाचा जोर वाढण्याची शक्यता आहे. शेतकरी, मच्छीमार आणि नागरिकांनी हवामान विभागाच्या सूचनांचे पालन करून आवश्यक खबरदारी घ्यावी, असे आवाहन प्रशासनाने केले आहे.
