देशभरात वारंवार समोर येणाऱ्या पेपर लीक प्रकरणांना आळा घालण्यासाठी केंद्र सरकार आता मोठा आणि ऐतिहासिक निर्णय घेण्याच्या तयारीत असल्याची माहिती समोर येत आहे. प्रश्नपत्रिकांच्या सुरक्षेसाठी भारतीय सैन्याची मदत घेण्याचा पर्याय सरकार गंभीरपणे विचाराधीन असल्याने शैक्षणिक वर्तुळात मोठी चर्चा रंगली आहे. विद्यार्थ्यांचा परीक्षा व्यवस्थेवरील विश्वास पुन्हा मिळवण्यासाठी हे पाऊल महत्त्वाचे मानले जात आहे.
प्रश्नपत्रिकांची छपाई झाल्यानंतर त्या परीक्षा केंद्रांपर्यंत पोहोचेपर्यंतच्या काळात पेपर फुटण्याचा सर्वाधिक धोका असतो. हा धोका पूर्णपणे टाळण्यासाठी प्रश्नपत्रिकांची वाहतूक आणि सुरक्षा थेट सैन्याकडे सोपवण्याचा प्रस्ताव चर्चेत आहे. सैन्याच्या देखरेखीखाली ही प्रक्रिया राबवली गेल्यास पेपर लीकला मोठ्या प्रमाणात आळा बसेल, असा सरकारला विश्वास आहे.
विशेषतः नीटसारख्या महत्त्वाच्या परीक्षांमधील पेपर लीक प्रकरणांमुळे विद्यार्थ्यांमध्ये तीव्र नाराजी निर्माण झाली होती. पारदर्शक परीक्षा प्रक्रिया आणि कडक सुरक्षा व्यवस्था निर्माण करण्यासाठी सरकार आता कठोर पावले उचलण्याच्या तयारीत आहे. मात्र, या प्रस्तावाबाबत अद्याप अधिकृत घोषणा करण्यात आलेली नसून अंतिम निर्णयाची सर्वत्र उत्सुकता लागली आहे.
