दिघा परिसरात वाढदिवस साजरा करताना झालेल्या किरकोळ वादातून एका तरुणाचा दगडाने खून करण्यात आल्याची धक्कादायक घटना समोर आली आहे. या प्रकरणी रबाळे एमआयडीसी पोलीस ठाण्यात गुन्हा दाखल करण्यात आला असून पोलिसांनी अवघ्या काही तासांत पाच आरोपींना अटक केली आहे.
पंढरीनगर परिसरातील काही मित्र १३ एप्रिल रोजी पहाटे अडीचच्या सुमारास वाढदिवस साजरा करण्यासाठी एकत्र आले होते. यावेळी दारूच्या नशेत जुन्या कारणावरून दोन मित्रांमध्ये बाचाबाची झाली. हा वाद चिघळत जाऊन त्याचे रूपांतर हाणामारीत झाले.
संतापाच्या भरात आरोपींनी संगनमत करून सोनराज सुरेश शिंदे (वय ३०) यांना घेराव घालत प्रथम हाताबुक्क्यांनी मारहाण केली. त्यानंतर मुख्य आरोपी कुणाल उर्फ घनश्याम चौधरी (वय २३) याने दगडाने डोक्यात व ओटीपोटावर प्रहार केला. त्यानंतर इतर आरोपी कुणाल राठोड (२२), वैभव मोरे (२४), महिंद्र नारायणकर (२४) आणि आकाश लाड (२२) यांनीही दगडाने मारहाण करत गंभीर जखमी केले. या हल्ल्यात शिंदे यांचा घटनास्थळीच मृत्यू झाला.
या घटनेत मध्यस्थी करण्याचा प्रयत्न करणाऱ्या फिर्यादी आकाश भास्कर पाईकराव (वय ३०) यांनाही आरोपींनी मारहाण केली. घटनेची माहिती मिळताच रबाळे पोलिसांनी घटनास्थळी धाव घेत तपास सुरू केला. वरिष्ठ पोलीस निरीक्षक सुनील वाघमारे यांच्या मार्गदर्शनाखाली पथकाने जलद हालचाली करत सर्व पाच आरोपींना अटक केली. “जुन्या वादातून ही घटना घडली असून सर्व आरोपींना ताब्यात घेतले आहे. पुढील तपास सुरू आहे,” असे तपासी अधिकारी सुनील वाघमारे यांनी आज सांगितले.
दरम्यान, घटनास्थळी पंकज डहाणे (पोलीस उपायुक्त, परिमंडळ-१, वाशी), राहुल धस (सहायक पोलीस आयुक्त, रबाळे विभाग), सुनील वाघमारे (वरिष्ठ पोलीस निरीक्षक), संजय गळवे, हेमराज साठे, दत्तात्रय पवार (सहायक पोलीस निरीक्षक) तसेच आकाश पाटील (पोलीस उपनिरीक्षक) यांनी भेट देऊन पाहणी केली. या प्रकरणी बीएनएस कलम १०३ (२), ११५ (२) तसेच इतर संबंधित कलमांनुसार गुन्हा नोंद करण्यात आला असून पुढील तपास सुरू आहे.
