राष्ट्रीय निवडणूक आयोगाने राष्ट्रवादी काँग्रेस पक्षाच्या राष्ट्रीय अध्यक्षा सुनेत्रा पवार यांना अधिकृत पत्र पाठवून पक्षघटनेतील महत्त्वाच्या दुरुस्त्यांबाबत स्पष्टीकरण मागवले आहे. पक्षघटनेतील विविध कलमांमध्ये करण्यात आलेल्या बदलांसंदर्भातील आवश्यक ठराव आणि वैध कागदपत्रे अपूर्ण असल्याचे आयोगाच्या निदर्शनास आले असून, तातडीने खुलासा सादर करण्याचे निर्देश देण्यात आले आहेत.
राष्ट्रीय निवडणूक आयोगाने 27 जुलै 2026 रोजी पाठवलेल्या पत्रात राष्ट्रवादी काँग्रेसच्या पक्षघटनेतील कलम 6, 7, 12, 18, 32 आणि 36 मध्ये करण्यात आलेल्या बदलांबाबत आवश्यक कागदपत्रे सादर करण्यात आलेली नसल्याची नोंद केली आहे. आयोगाच्या माहितीनुसार, 26 फेब्रुवारी 2026 रोजी झालेल्या राष्ट्रीय अधिवेशनातील ठरावात केवळ कलम 18(1) मधील दुरुस्तीचा स्पष्ट उल्लेख आहे. मात्र, इतर कलमांमध्येही बदल करण्यात आल्याचे दिसून येत असून, त्या दुरुस्त्यांना मान्यता देणारे अधिकृत ठराव आणि प्रस्ताव आयोगाकडे उपलब्ध नाहीत.
आयोगाने या सर्व घटनात्मक दुरुस्त्यांच्या समर्थनार्थ वैध कागदपत्रे, अधिकृत ठराव आणि आवश्यक स्पष्टीकरण तातडीने सादर करण्याचे निर्देश राष्ट्रवादी काँग्रेसला दिले आहेत. पक्षाकडून सर्व प्रलंबित कागदपत्रे प्राप्त झाल्यानंतरच या घटनादुरुस्त्यांबाबत अंतिम निर्णय घेतला जाणार असल्याचे आयोगाने स्पष्ट केले आहे. त्यामुळे या प्रकरणाकडे राज्याच्या राजकीय वर्तुळात विशेष लक्ष लागले असून, पक्षाकडून दिल्या जाणाऱ्या स्पष्टीकरणाकडे सर्वांचे लक्ष आहे.
