माथेरान घाटात ‘थार’ गाडीला अपघात, चार जण बालबाल बचावले

रविवारच्या विकेंड सुट्टीचा आनंद घेण्यासाठी माथेरानच्या थंड हवामानात पर्यटकांची मोठी गर्दी पाहायला मिळत आहे. हिरवळीच्या निसर्गरम्य परिसरात फेसाळणारे धबधबे आणि डोंगरदऱ्यांचे सौंदर्य अनुभवण्यासाठी आलेल्या पर्यटकांच्या एका गाडीला सकाळी साडे नऊ वाजण्याच्या सुमारास भीषण अपघात झाला. गुजरात क्रमांकाची ‘थार’ (GJ 01 MU 2389) ही कार माथेरान घाट चढत असताना चालकाचे नियंत्रण सुटल्याने ती थेट खड्ड्यात कोसळली. चार प्रवासी किरकोळ जखमी झाले असून मोठी जीवितहानी टळली आहे.

जुमापट्टी रेल्वे स्थानकाच्या वरच्या पहिल्या रेल्वे क्रॉसिंगजवळ वळणावर ही घटना घडली. एक स्कुटी चालवत असलेल्या महिलेला वाचवण्याच्या प्रयत्नात कार चालकाचे वाहनावरील नियंत्रण सुटले. त्यामुळे रस्त्याच्या कडेला असलेली लोखंडी रेलिंग तोडून ही गाडी थेट खड्ड्यात जाऊन पडली. सुदैवाने कारमधील कोणालाही गंभीर दुखापत झाली नाही. मात्र, कारचे मोठ्या प्रमाणावर नुकसान झाले आहे. अपघातानंतर काही काळ वाहतूक कोंडी झाली होती.

अपघातग्रस्त पर्यटक अहमदाबाद येथून आले होते. त्यांच्या मित्रांचा दुसरा गट दुसऱ्या कारमध्ये होता. अपघातग्रस्त ‘थार’ कारला टॉईंग करून बाहेर काढण्यात आल्याने वाहतुकीचा अडथळा दूर झाला. स्थानिक प्रशासन व पोलिसांनी तातडीने मदतकार्य करत परिस्थिती नियंत्रणात आणली.