नाशिक पोलिसांनी ‘कॅप्टन’ अशोक खरात या भोंदू बाबाला बलात्काराच्या आरोपाखाली अटक केल्यानंतर महाराष्ट्राच्या राजकारणात आणि सामाजिक वर्तुळात मोठी खळबळ उडाली आहे. या प्रकरणावरून आता राज्य महिला आयोगाच्या अध्यक्षा रुपाली चाकणकर यांच्यावर टीकेची झोड उठवण्यात आली असून, त्यांच्या राजीनाम्याची मागणी जोर धरू लागली आहे.
पोलिसांनी अटक केलेल्या अशोक खरात याच्याकडून जप्त केलेल्या पेनड्राईव्हमध्ये सुमारे ५८ महिलांच्या लैंगिक शोषणाचे व्हिडिओ आढळले आहेत, अशी धक्कादायक माहिती समोर आली आहे.
महाराष्ट्र प्रदेश काँग्रेस सरचिटणीस श्रद्धा ठाकूर यांनी असा आरोप केला आहे की, रुपाली चाकणकर या या भोंदू बाबाच्या ‘श्री शिवनिक संस्थान’ या संस्थेवर सदस्य म्हणून कार्यरत आहेत. महिलांचे रक्षण करणे हे त्यांचे कर्तव्य असताना त्या अशा व्यक्तीला पाठिशी घालत असल्याचा दावा ठाकूर यांनी केला आहे. चारित्र्य हननाचा आरोप: महिलांना न्याय मिळवून देण्याऐवजी, वैष्णवी हगवणे किंवा डॉक्टर संपदा मुंडे यांच्यासारख्या प्रकरणांमध्ये महिलांचे चारित्र्य हनन करण्याचे काम चाकणकर यांनी केल्याचा आरोपही यावेळी करण्यात आला.
राजीनाम्याची मागणी: ज्या महिला आयोगाच्या अध्यक्षांनी महिलांच्या पाठीशी उभे राहायला हवे, त्या स्वतःच एका गुन्हेगारी प्रवृत्तीच्या व्यक्तीच्या संपर्कात कशा असू शकतात, असा सवाल उपस्थित करत ठाकूर यांनी रुपाली चाकणकर यांनी तात्काळ आपल्या पदाचा राजीनामा द्यावा, अशी मागणी केली आहे. श्रद्धा ठाकूर यांनी राज्याच्या पहिल्या महिला उपमुख्यमंत्री सुनेत्राताई पवार यांनाही या प्रकरणात लक्ष घालण्याचे आवाहन केले आहे. “एक महिला म्हणून सुनेत्राताईंनी चाकणकर यांची पाठराखण न करता, त्यांच्या या वागणुकीबद्दल त्यांचा तात्काळ राजीनामा स्वीकारावा,” अशी मागणी त्यांनी केली आहे.
या प्रकरणामुळे आता राज्य महिला आयोगाच्या भूमिकेवर प्रश्नचिन्ह उपस्थित झाले असून, येणाऱ्या काळात हे प्रकरण अधिक तापण्याची शक्यता आहे.
