रविवारी पावसाने रात्रभर झोड उठविल्याने सोमवारी सकाळी पोलादपूर तहसिल कार्यालयातील आपत्ती नियंत्रण कक्षामध्ये गेल्या चोवीस तासांत पावसाची 94 मि.मी.नोंद झाल्याची माहिती प्राप्त झाली. रविवारी दिवसभरामध्ये दोन घरांचे नुकसान झाल्याचे तसेच तालुक्यातील पोलादपूर महाबळेश्वर वाई सुरूर रस्त्यावर सुरू असलेल्या रस्तारूंदीकरणावर झाडं कोसळल्याच्या घटना झाल्यामुळे एकेरी वाहतूक सुरू ठेवण्यात आल्याची माहिती प्राप्त झाली आहे.
यामुळे पोलादपूर महाबळेश्वर वाई सुरूर आंबेनळी घाटरस्ता पावसाळयात असुरक्षित झाला असूनही याबाबत संबंधित यंत्रणांनी दुजोरा न दिल्याने या घाटातून वाहतूकीदरम्यान मोठया अपघाताला सामोरे जावे लागल्याशिवाय या धोक्यावर शिक्कामोर्तब करण्यात येणार नाही हे उघड झाले आहे.
महाराष्ट्र राज्य पायाभूत सुविधा विकास महामंडळ रायगडमधील पोलादपूर आणि सातारा जिल्ह्यातील महाबळेश्वर सुरूर दरम्यान 23.8 किमी लांबीचा रस्ता (राज्य महामार्ग-139) रुंदीकरण प्रकल्प राबवत आहे. प्रस्तावित 10 मीटर ते 18 मीटर रुंदीचे काम अंदाजे 108कोटी रुपये खर्चाने राबविण्यात येत आहे. सध्याच्या रस्त्याची रुंदी 5.5 मीटर ते 7 मीटर दरम्यान आहे. प्रस्तावित रस्ता चार प्रकारांमध्ये विभागलेला आहे: 7.820 किमी लांबीचा खुला, 1.950 किमी लांबीचा बांधलेला, 2.500 किमी लांबीचा वन क्षेत्रातून आणि डोंगरदऱ्यांतून 11.530 किमी लांबीच प्रस्तावित रस्ता पोलादपूर तालुक्यातील पोलादपूर, कापडे बुद्रुक, आड-चांभारगणी, किनेश्वर, पायटे, कुंभळवणे, कापडे खुर्द, दाभिळ आदी 8 गावांमध्ये पसरलेला आहेत. या रूंदीकरणामध्ये लालसर माती आणि मुरूम यांचा समावेश आहे.
रुंदीकरणाच्या कामासाठी डोंगर-टेकडयांचे उभे उतारपट्टे कापले जात असून काही ठिकाणी साईडपट्टीवरही उत्खनन करून आंबेनळीतील घाटरस्ता असुरक्षित करण्यात आला आहे. उत्खनन केलेली माती डोंगराळ प्रदेशात जिथे जागा उपलब्ध असेल तिथे वाहून नेली जाते आणि टाकली जाते. यामध्ये सावित्री नदीच्या काठाचाही समावेश आहे. सावित्री चोळई नद्यांच्या प्रवाहालगत मातीचे ढिगारे टाकल्याने या नद्याकाठांच्या काठावरील परिसर धोक्यात येत आहे.
रस्त्याचे काम ऑॅक्टोबर 2024 मध्ये सुरू करण्यात आले होते आणि ते अडीच वर्षांच्या कालावधीत पूर्ण केले जाणार होते. यात 38 बॉक्स कल्व्हर्ट, 74 पाईप कल्व्हर्ट, 4छोटे पूल आणि 1 मोठा पूल (राखीव) असेल. सध्याचा बिटुमिनस रस्ता दुरुस्त करण्यात आला आहे. मात्र, पोलादपूर ते दाभिळ पर्यंतच्या डोंगरालगतच्या भागातील रस्त्यालगतचा डोंगर कापण्यात आला असून यामुळे डोंगरातील लालमातीचे ढिगारे रस्त्यावर येण्याची परिस्थिती आगामी पावसाळयामध्ये कायम उदभवणार असल्याचे स्पष्ट झाले आहे.
अशातच, रविवारी दिवसभर झालेल्या 94 मि.मी. पावसामुळे दोन ठिकाणी झाडं आणि मातीचे ढिगारे या रूंदीकरणाच्या रस्त्यावर कोसळल्याने सोमवारी सकाळी आंबेनळी घाट झाडं कोसळलेल्या ठिकाणी एकेरी वाहतुकीसाठी खुला राहिला. ठेकेदारांनी झाडे आणि मातीचे ढिगारे हटविल्यानंतर वाहतूक पूर्ववत सुरू झाली. रस्ता रूंदीकरणाच्या कामाच्या ठिकाणी खणलेल्या साईडपट्टीलगत सिमेंटच्या रिकाम्या गोणींमध्ये माती भरून संरक्षक कठडे उभे करण्यात आल्याचा आभास निर्माण केला आहे. याठिकाणी तीव्र वळण उतारांलगत खणलेल्या साईडपट्टयावर वाहने जाऊन अपघात झाले असून त्याबाबत कोणतीही तक्रार केली गेली नसल्याने या प्रश्नाचे गांभिर्य मोठया अपघातानेच अधोरेखित होणार असल्याचे स्पष्ट आहे.
रविवारी वादळी पावसामुळे पळचिल गोलदरा येथील रमेश राजाराम शेलार यांची घराची भिंत कोसळली असून कुडपण येथील मंगल पांडुरंग चिकणे यांच्या घराच्या बाजूची संरक्षक भिंत कोसळले असून पडवीचे पत्रे उडाले आहेत.
