Shiv Jayanti 2024 : शिवजयंतीनिमित्त नागोठणे शहर झाले भगवेमय

नागोठणे ( महेंद्र माने ) :

हिंदवी स्वराज्य संस्थापक छत्रपती शिवाजी महाराज यांची जयंती फाल्गुन कृ. 3 गुरुवार 28 मार्च रोजी नागोठणे नगरीत शिवसेना विभागीय शाखेत भगव्या वातावरणात तसेच शहरातून भव्य मिरवणुक काढून साजरी करण्यात आली.

शिवजयंतीनिमित्त गुरुवार 28 मार्च रोजी सकाळी 10.00 वा. किल्ले रायगड येथून आणण्यात आलेल्या शिवज्योतिचे आगमन. त्यानंतर शिवसेना शाखेत शिवपुतळ्याचे पुरोहिताच्या उपस्थितीत विधिवत पूजन करून महा शिवआरती घेण्यात आले. यावेळी शिवजयंती उत्सव कमिटीचे अध्यक्ष-उपाध्यक्ष व पदाधिकारी तसेच शिवप्रेमी उपस्थित होते.

शिवसेना रायगड जिल्हा सहसंपर्क प्रमुख किशोर जैन,सरपंच सुप्रिया संजय महाडीक,मा.सरपंच डॉ.मिलिंद धात्रक,उपसरपंच अकलाक पानसरे,उपविभागप्रमुख संजय महाडिक,शाखाप्रमुख धनंजय जगताप, ,कीर्तीकुमार कळस,बाळू रटाटे,ग्रा.पं.सदस्य ज्ञानेश्वर साळुंखे व प्रकाश कांबळे,ग्रा.पं.सदस्या – भविका गिजे व आमृता महाडीक यांच्यासह मोहन नागोठणेकर भाई शिर्के, विजय शहासने,भक्ति जाधव तसेच उत्सव कमिटी अध्यक्ष, उपाध्यक्ष,पदाधिकारी व सदस्य यांच्या प्रमुख उपस्थितीत सायंकाळी 6.00 वा.शिवाजी महाराजांच्या पुतळ्याची पालखीतून मिरवणूक काढण्यात आली.

या भव्य मिरवणुकीत रथ,नाचणारा घोडा,घोड्यावरील शिवाजी महाराज,बाल शिवराजे, जिजामाता,मावळे यांच्यासह भगवे झेंडे,खालूचा बाजा,ढोल-ताशांचा गजर,मर्दानी खेळ तसेच भगवे फेटे परिधान केलेल्या हजारो शिवप्रेमींच्या उपस्थितीत वाजत-गाजत फटाक्याच्या आताषबाजीत “शिवाजी महाराज कि जय”,“जय भवानी-जय शिवाजी”,“हर हर महादेव”च्या गजरात भगव्या वातावरणात निघालेली ही मिरवणूक छत्रपती शिवाजी महाराज चौक,छत्रपती शिवाजीमहाराज बाजार पेठ,खुमाचा नाका (मुस्लिम मोहल्ला),गांधी चौक,जोगेश्वरी मंदिर,ग्रामपंचायतमार्गे शिवसेना शाखेत सांगता करण्यात आली.

या मिरवणुकीचे जागोजागी स्वागत व महाराजांच्या पुतळ्याचे पूजन करण्यात आले. ही मिरवणूक शाखेत आल्यानंतर आलेल्या मान्यवरांचे श्रीफळ देऊन स्वागत करण्यात आले. सदरील मिरवणूक खुमाचा मिरवणुकीत कोणताही अनुचित प्रकार घडू नये यासाठी सहा.पोलिस निरीक्षक हरेश काळसेकर यांच्या मार्गदर्शनाखाली पुरेसा पोलिस बंदोबस्त ठेवण्यात आला होता.

खुमाचा नाक्यात जोरदार स्वागत

छत्रपती शिवाजी महाराजांची भव्य पालखी मिरवणूक वाजत गाजत खुमाचा नाका (मुस्लिम मोहल्ला) येथे आल्यानंतर उपसरपंच अकलाक पानसरे यांच्या नेतृत्वाखाली तिचे फटाक्यांच्या आताषबाजित व सर्व शिवप्रेमींना पाणी व सरबतचे वाटप करून जोरदार स्वागत करण्यात आले.