PEN : गोवंश हत्या प्रकरणातील मुख्य आरोपीला नाट्यमय पाठलागानंतर अटक

PEN न्यूज ऑनलाइन टीम : 

पेण शहरातील जुन्या आर.टी.ओ. ऑफिससमोर राहणारे दुग्ध व्यावसायिक प्रकाश शिंगरुत यांच्या गुरांमधील एका बैलाची तीन महिन्यांपूर्वी चोरी करून कत्तल करण्याचा प्रकार घडला होता. या प्रकरणातील फरार दोन आरोपी इस्माईल शम्सी उर्फ गोरु आणि अशफी डॅनियल मद्दु उर्फ एचपी यांचा शोध घेऊन पेण पोलीस ठाण्याच्या गुन्हे प्रकटीकरण शाखेच्या पथकाने त्यांना अटक केली आहे.

सखोल चौकशीत या गुन्ह्यात मुख्य सूत्रधार म्हणून कल्याणचा इब्राहिम इस्माईल मजीद उर्फ पापा हड्डी याचे नाव पुढे आले. मात्र तो पोलिसांना सतत हुलकावणी देत होता. अखेर पेण पोलिसांनी गोपनीय माहितीच्या आधारे तसेच तांत्रिक बाबींचा वापर करून त्याचा मागोवा घेतला. त्यानुसार इगतपुरी पोलिसांच्या मदतीने समृद्धी महामार्गावर कल्याणच्या दिशेने निघाल्याची खात्री झाल्यानंतर पोलिस पथक इगतपुरी टोलनाक्यावर पोहोचले.

रात्री २ वाजण्याच्या सुमारास टोल नाक्यावर नाकाबंदी केली असता आरोपीने ट्रॅफिक जाम पाहून संशय बळावल्याने उलट दिशेने गाडी फिरवून पळण्याचा प्रयत्न केला. मात्र, पोलिसांनी अत्यंत कौशल्याने थरारक पाठलाग करून त्याला अटक केली.

पेण पोलिसांच्या या धडाकेबाज कारवाईमुळे गुन्ह्याच्या तपासाला मोठे यश मिळाले असून, पुढील तपास सुरू आहे.