MPSC परीक्षेच्या वयोमर्यादेत मोठा बदल; इच्छुक उमेदवारांना दिलासा

PEN न्यूज ऑनलाइन टीम :

दरवर्षी राज्य लोकसेवा आयोगाच्या (एमपीएससी) परीक्षेसाठी हजारो विद्यार्थी तयारी करतात. मात्र, वयोमर्यादेमुळे अनेक इच्छुक परीक्षेसाठी अपात्र ठरतात. याच अटीत आता मोठा बदल करण्यात आला असून, वयोमर्यादेत शिथिलता देण्याचा निर्णय घेण्यात आला आहे.

मुख्यमंत्री देवेंद्र फडणवीस यांनी यासंदर्भातील निर्णयाची घोषणा केली आहे. 31 डिसेंबर 2023 पर्यंत शासकीय सेवेसाठी होणाऱ्या सरळ सेवा नियुक्ती जाहिरातींना अनुसरून अर्ज करणाऱ्या उमेदवारांसाठी कमाल वयोमर्यादेत एक वर्षाची शिथिलता देण्यात आली आहे.

महाराष्ट्र गट-ब आणि गट-क सेवा संयुक्त परीक्षांसाठी ही सवलत लागू करण्यात आली आहे. 1 जानेवारी 2024 पासून ज्या जाहिराती प्रसिद्ध होणार आहेत आणि निवड प्रक्रियेच्या कोणत्याही टप्प्यात नसलेल्या जाहिरातींनाही याचा समावेश असेल.

हा निर्णय लाखो इच्छुक उमेदवारांसाठी संधीचे नवीन दार उघडणार आहे. वयोमर्यादा ओलांडलेल्या उमेदवारांना याचा थेट फायदा होणार असून, त्यांनी अर्ज करण्याची नवी संधी मिळणार आहे.