Mangaon : उतेखोलगांवचा शिवजयंती उत्सव डिजेमुक्त, पारंपारिक जल्लोषात साजरा !

माणगांव ( रविंद्र कुवेसकर ) :

अखंड हिंदूस्थानचे आराध्य दैवत, हिंदवी स्वराज्य संस्थापक छत्रपती शिवरायांची तिथी नुसार जयंती उतेखोल येथे श्री वाकडाई देवी मित्रमंडळ आणि हिंदवी विचार मंच माणगांव संयुक्त विद्यमाने उत्सवाचे पावित्र्य राखत उतेखोल गावच्या युवती अर्थात जिजाऊच्या लेकींनी भगवे फेटे, नऊवारी साडी परिधान करुन देगांव खालुबाजाच्या खणखणीत तालावर लयबध्द लेझिम खेळत शिवभक्त माणगांव व नगरीचे नगराध्यक्ष ज्ञानदेव पवार यांचेसह शिवभक्त उद्योजक नितीन बामुगडे, व्यापारी संघटनेचे लक्ष्मण दळवी, रविकिरण पालवे, रमेश ढेबे, काशिनाथ गाणेकर, चिन्मय मोने, प्रोफेसर बिरादार तसेच साबळे विद्यालयाचे शिक्षकवृंद, उतेखोलचे शरद(बबन) जाधव, राजेश सोंडकर, राकेश जाधव, व ग्रामस्थांच्या मुख्य उपस्थितीत शिवजयंतीला कचेरीरोड वरुन निघालेली शिवरायांची पालखी मिरवणुक डिजेमुक्त पारंपारिक जल्लोषात साजरी झाली.

गुरुवार दि.२८ मार्च रोजी रायगडावरुन येथे सकाळी शिवज्योत आणुन, शिवरायांचे मुर्तीला मनोभावे विधीवत दुग्धाभिषेक जलाभिषेक घालत, आरती ओवाळत येथे पौराहित्य करणारे जंगम गुरुजींनी तालासुरात शिवरायांची आरती गाऊन पुजाअर्चा संपन्न झाली. अत्यंत पारंपारिक पध्दतीने सुबक भरगच्च नियोजनाने श्री वाकडाई देवी मित्र मंडळ व हिंदवी विचार मंच तर्फे शिवरायांना जयंतीदिनी मानाचा मुजरा व अभिवादन करण्यात आले.

तसेच दिवसभर लेझीम आणि देगांव येथिल खालुबाजाच्या ठेक्यावर पालखी मिरवणूक तसेच धामणी गावातील मर्दानी आखाड्यात सादर झालेली चित्तथरारक प्रात्यक्षिकं, लाठी-काठी आणि दुर्गवीरांचं गडकिल्ल्यांचं देखणे फोटो प्रदर्शन, इतिहास अभ्यासक रामजी कदम यांचे शिवचरित्रपर व्याख्यान व तब्बल दोन तास प्रेक्षकांना खिळवून ठेवणारा तुळजापूरच्या विजय मोरे जागरण गोंधळ समुहाने मांडलेला गोंधळ, पहिल्यांदाच एक आदर्शवत श्रीशिवजयंती उत्सव माणगांवात
साजरा झाला. अशा प्रकारे आता दरवर्षी कायम ऐतिहासिक हिंदवी वारसा जोपासत लोकसहभागातुनच आदर्शवत शिवजयंती साजरी करण्यात येईल असे हिंदवी विचार मंचचे मुख्य संघटक चिन्मय अमोल मोने यांनी सांगितले आहे.