Kolad : द.ग.तटकरे हायस्कूलकडे जाणाऱ्या रस्त्याचे तिनतेरा, रस्त्यात खड्डा की खड्ड्यात रस्ता? विद्यार्थ्यांसह रहिवाशी त्रस्त

कोलाड (श्याम लोखंडे ) :

मुंबई-गोवा महामार्ग ६६ लगत जोडला गेलेला कोलाड येथील द.ग.तटकरे माध्यमिक हायस्कूल कोलाड कडे जाणाऱ्या रस्त्याची परिस्थिती अत्यंत भयानक झाली असून अक्षरशः त्याचे तीनतेरा वाजले असुन रस्त्यात खड्डा कि खड्ड्यात रस्ता! अशी या रस्त्याची अवस्था झाली असुन या मार्गावरून प्रवास करतांना विद्यार्थ्यांना जीव मुठीत धरून प्रवास करावे लागत आहे. त्यामुळे विद्यार्थ्यासह,रहिवाशी नागरिक संतप्त झाले असून यावर लवकरात लवकर उपाय योजना करण्यात यावी अशी मागणी केली जात आहे.

रायगडाचे लोकप्रिय खासदार सुनील तटकरे यांचे प्राथमिक मराठी शाळेत शिक्षण घेतलेल्या शाळेकडे तसेच,द.ग.तटकरे माध्यमिक व उच्च माध्यमिक विद्यालय, व जोडला गेलेला आंबेवाडी कडे जवळचा मार्ग असल्यामुळे धाटाव एम.आय.डी. सी मध्ये कामावर जाणारे असंख्य गावातील कामगार याच मार्गाने ये जा करीत असतात गेली दोन ते तीन वर्षांपासून या रस्त्याची अवस्था रस्त्यात खड्डा की खड्ड्यात रस्ता अशी झाली आहे तसेच हा रस्ता अरुंद असल्यामुळे या रस्त्यातून मार्ग काढतांना प्रवाशी वर्गाला तारेवरची कसरत करावी लागत आहे.

पावसाळ्यात तर या रस्त्याला पडलेल्या खड्ड्यात पाणी साचून खड्डे दिसत नाही यामुळे या मार्गांवर अपघात होतांना दिसत आहेत गेल्या पावसाळ्यात या मार्गानी जाणारे शालेय विद्यार्थी खड्ड्याचा अंदाज न आल्यामुळे टुव्हीलर स्लिप होऊन खाली पडले परंतु सुदैवाने ते थोडक्यात बचावले. यामुळे ” गाव तेथे चांगला रस्ता, हे शासनाचे ब्रिद वाक्य कागदावर राहिले असल्याचे दिसून येत आहे. परंतु या मार्गानी प्रवास करणारे विद्यार्थी, शिक्षक, रहिवाशी नागरिक, कामगार यांच्या जिवाला धोका निर्माण झाला असुन कोणाचा नाहक बळी गेल्यानंतर या रस्त्याचे काम पूर्ण होईल काय? अशी संतप्त प्रतिक्रिया प्रवाशी वर्गातून व्यक्त करण्यात येत आहे.