Alibag : दिलीप भोईर(छोटम शेठ) यांची सहा वर्षांकरिता पक्षातून हकालपट्टी

Chotam Sheth
अलिबाग ( अमुलकुमार जैन ) :
अलिबाग विधान सभा मतदार संघात आमदारकीची निवडणूक लढविण्यासाठी महायुतीमधील भारतीय जनता पक्षाचे उपजिल्हाध्यक्ष व रायगड जिल्हा परिषदेचे माजी समाजकल्याण सभापती दिलीप भोईर यांनी अपक्ष म्हणून उमेदवारी अर्ज दाखल केला होता. आज अर्ज मागे घेण्याच्या शेवटच्या दिवशी त्यांनी अर्ज मागे घेतला नाही. त्यामुळे त्यांनी युती धर्म पाळला नाही व पक्ष विरोधी काम केल्याने त्यांची पक्षातून हकालपट्टी करण्यात आली असल्याची भाजपा दक्षिण रायगड जिल्हा अध्यक्ष धैर्यशील पाटील यांनी अलिबाग गोंधळपाडा नजीकच्या वृंदावन सोसायटी येथे आयोजित पत्रकार परिषदेमध्ये खासदार धैर्यशील पाटील यांनी पत्रकांबरोबर संवाद साधला.
यावेळी सतीश धारप, ऍड. महेश मोहिते , मिलिंद पाटील, उदय काठे, गिरीश तुळपुळे, राजेश पाटील आदी पदाधिकारी उपस्थित होते.
दिलीप भोईर हे भाजपाच्या तिकिटावर निवडणूक लढविण्यास इच्छुक होते. मात्र महायुती मधील जागा वाटपामध्ये अलिबाग मतदार संघाची उमेदवारी शिवसेना शिंदे गटाचे विद्यमान आमदार महेंद्र दळवी यांना आल्याने भाजपचे जिल्हा उपाध्यक्ष दिलीप भोईर हे नाराज होते. त्यांनी जोरदार शक्ती प्रदर्शन करीत उमेदवारी अर्ज दाखल केला होता. भोईर हे पूर्वी शेकापक्षात होते. दोन वर्षापूर्वी ते भाजपमध्ये आले.
अलिबाग मुरुड मतदार संघातील काम पाहून भाजपने त्यांना जिल्हा उपाध्यक्ष तसेच अलिबागच्या भाजपच्या वॉर रूमची जबाबदारी भोईर दिली होती. मतदार संघात भोईर यांनी भाजपची ताकद वाढविली होती.अलिबागचा पुढील आमदार भाजपचा असेल असे वक्तव्य पक्षाचे प्रदेशाध्यक्ष चंद्रशेखर बावनकुळे यांनी अलिबाग येथे केले होते. त्यामुळे भोईर हे भाजपा उमेदवारी देईल म्हणून आशावादी होते. मात्र महायुती जागा वाटपामध्ये अलिबागची उमेदवारी शिंदे गटाचे आमदार महेंद्र दळवी यांना दिल्याने ते नाराज होते.
दिलीप भोईर यांनी विधान सभा निवडणुकीसाठी अर्ज भरण्याच्या शेवटच्या दिवशी मोठा गाजावाजा करीत उमेदवारी अर्ज दाखल केला होता. त्यांनी उमेदवारी अर्ज मागे घ्यावे यासाठी भारतीय जनता पक्षासहित महायुतीच्या विविध पदाधिकारी यांनी संवाद साधत होते. मात्र त्यांच्या संवादाला प्रतिसाद दिला नाही.अलिबाग- मुरुड- रोहा विधानसभा मतदार संघात महायुतीच्या अधिकृत उमेदवाराविरोधात भारतीय जनता पार्टीचे बंडखोर दिलीप भोईर यांनी निवडणूक रिंगणात उमेदवारी अर्ज कायम ठेवला.
यामुळे पक्षविरोधी कारवाई केल्याचा ठपका ठेवून भारतीय जनता पार्टीच्या प्रदेश अध्यक्षांच्या सूचनेनुसार भाजपचे रायगड जिल्हा उपाध्यक्ष आणि अलिबाग मुरुड विधानसभा अध्यक्ष दिलीप भोईर यांना पक्षातून सहा वर्षांसाठी निलंबित करण्यात आले असल्याची माहिती रायगड जिल्हाध्यक्ष तथा राज्यसभेचे खासदार धैर्यशील पाटील यांनी पत्रकार परिषदेमध्ये दिली.
भारतीय जनता पार्टीचे उपाध्यक्ष आणि अलिबाग मुरुड विधानसभा अध्यक्ष दिलीप भोईर यांनी विधानसभेसाठी उमेदवारी अर्ज भरला होता. महायुतीच्या धोरणानुसार अधिकृत उमेदवार असतानाही उमेदवारी अर्ज भरल्याने त्यांना वरिष्ठ नेत्यांनी आणि स्थानिक नेत्यांनी उमेदवारी अर्ज मागे घेण्यासंदर्भात समजूत काढण्याचा प्रयत्न केला होता. परंतु उमेदवारी अर्ज माघारीच्या दिवशी दिलीप भोईर यांनी आपला उमेदवारी अर्ज कायम ठेवून पक्षाच्या धोरणाविरोधात कारवाई केल्याने त्यांना भारतीय जनता पार्टीमधून सहा वर्षांसाठी निलंबित करण्यात आले आहे.
त्यांच्यासमवेत असणाऱ्या भाजपच्या कार्यकर्त्यांना देखील याबाबतची समाज देण्यात आली आहे. तूर्तास दिलीप भोईर यांच्यावरच निलंबनाची कारवाई करण्यात आली असून कार्यकर्त्यांनी त्यांच्यासोबत राहून काम केल्यास पक्षाला कटू निर्णय घेऊन त्यांच्यावर कारवाई कारवाई लागेल असे स्पष्ट मत खासदार धैर्यशील पाटील यांनी मांडले.
यावेळी भाजपचे ज्येष्ठ नेते सतिश धारप यांनी सांगितले की, महेंद्र दळवी हेच महायुतीचे उमेदवार असून त्यांचा विजय होण्यासाठी कार्यकर्त्यांनी पराकाष्ठा करायची आहे. विधानसभेचे अध्यक्ष नार्वेकर यानी त्याच्याशी चर्चा केली होती. मुख्यमंत्री कार्यालयाकडून संपर्क करण्याचा प्रयत्न केले होते मात्र दिलीप भोईर यांनी काल संध्याकाळ पासून प्रतिसाद देणे बंद केले होते. कार्यकर्ते हे महेंद्र दळवी यांच्या निवडणुकीच्या कामाला लागले. महेश मोहिते सुद्धा अचूक होते. महेंद्र दळवी यांच्या भाच्यानी महायुतीच्या पदाधिकारी यांच्या शब्दाला मान देत पेण येथून उमेदवारी अर्ज मागे घेतले आहे. महायुतीची घौडदौड सुरू आहे.
अलिबाग विधानसभा मतदार संघात तयार झालेली परिस्थिती २०१९च्या निवडणुकीत उरण मतदार संघात तयार झाली होती. त्यावेळी भरतोय जनता पार्टीने महेश बालदी यांच्यावर कोणतीच कारवाई केली नव्हती. कारण त्यांच्या पाठीवर भाजपच्या बड्या नेत्याचा वरदहस्त होता. दिलीप भोईर यांनी देखील भाजप वाढविण्यासाठी आकाश पातळ एक करून आमदारकी लढविण्याचे स्वप्न पहिले आणि उमेदवारी अर्ज भरला. परंतु बड्या नेत्याचा वरदहस्त नसल्याने त्यांच्यावर भाजपने निलंबनाची कारवाई केली असल्याची चर्चा मतदारसंघात ऐकू येत आहे.

Leave a Reply

Your email address will not be published. Required fields are marked *

WA_Adv_001-copy

आपण हि बातमी कॉपी करू शकत नाही.

Discover more from Pen News

Subscribe now to keep reading and get access to the full archive.

Continue reading