Accident: ताम्हिणी घाटात कारची एसटीला समोरासमोर जोरदार धडक; अपघातात दोघांचा जागीच मृत्यू , तीन जखमी

रायगड (अमुलकुमार जैन) : 

ताम्हिणी घाटात रायगड जिल्ह्याच्या हद्दीत रेस्ट हाऊस च्या अलीकडे मंगळवारी (ता. 4) दुपारी एक दीड वाजताच्या सुमारास एसटी बस व कारचा भीषण अपघात झाला. या अपघातात कारमधील दोघांचा मृत्यू झाला असून तिघेजण जखमी आहेत.

प्राप्त महितीनुसार, खेड – चिंचवड ही एसटी बस पुण्याच्या दिशेकडे जात होती. तर स्विफ्ट कार विळे गावाच्या दिशेकडे येत होती. उतार व वेग असल्यामुळे तसेच गाडीवरील ताबा सुटल्याने स्वीट कार एसटी बसला समोर जाऊन धडकली. ही धडक एवढी जोरदार होती की यामध्ये स्विफ्टच्या चालकाच्या बाजूचा भाग बसमध्ये शिरून पूर्ण चेपला गेला आहे. त्यामुळे कारचालक व चालकाच्या पाठीमागे बसलेली जेष्ठ महिला यांचा मृत्यू झाला.

तसेच हे दोन्ही मृतदेह कारमध्येच अडकून पडले. सह्याद्री वन्यजीव रक्षणार्थ सामाजिक संस्थेचे सदस्य घटनास्थळी जाऊन त्यांनी आधुनिक साधनांच्या माध्यमाने दुपारी 3 वाजता अडकलेले मृतदेह बाहेर काढण्याचे काम सुरु केले. कार मधील तीन जखमींना माणगाव येथील उपजिल्हा रुग्णालयात उपचारासाठी हलविण्यात आले आहे. जखमी मध्ये एका लहान मुलीचा देखील समावेश असून एसटी मधील कोणीही जखमी झाले नसल्याची प्राथमिक माहिती प्राप्त झाली आहे. 

अपघाताची माहिती मिळताच विळे दूरक्षेत्र पोलीस ठाण्याचे पोलीस उपनिरीक्षक राठोड व पोलीस विनोद तांदळे घटनास्थळी पोहोचले. तसेच येथील तुषार कदम व राकेश दगडे यांनी देखील घटनास्थळी जाऊन मदतकार्य सुरू केले. माणगाव पोलीस स्थानकाचे पोलीस निरीक्षक निवृत्ती बोऱ्हाडे व पोलीस कर्मचारी हे देखील रेस्क्यू टीम सोबत घटनास्थळी पोहचले.