हिवाळी अधिवेशनात 33,788 कोटींच्या पुरवणी मागण्या; ‘लाडकी बहीण’ योजनेसाठी 1400 कोटींची तरतूद

नागपूर :

नागपुरात हिवाळी अधिवेशनाची आजपासून सुरुवात झाली असून, मुख्यमंत्री देवेंद्र फडणवीस यांच्या नेतृत्वाखालील सरकारने 33,788.40 कोटी रुपयांच्या पुरवणी मागण्या विधानसभेत सादर केल्या. या अधिवेशनात ‘मुख्यमंत्री माझी लाडकी बहीण’ योजनेसाठी 1400 कोटी रुपयांची तरतूद करण्यात आली आहे. ही योजना यापुढेही सुरू राहणार असल्याची मोठी घोषणा मुख्यमंत्री देवेंद्र फडणवीस यांनी केली आहे.

याशिवाय, मुंबई मेट्रो-3 साठी 655 कोटींची अतिरिक्त तरतूद करण्यात आली आहे, तर छत्रपती शिवाजी महाराजांच्या राजकोटावरील पुतळ्यासाठी 36 कोटी रुपयांचा निधी मंजूर करण्यात आला आहे. हा पुतळा प्रसिद्ध मूर्तिकार राम सुतार यांच्या कडून तयार केला जाणार आहे.

पुरवणी मागण्यांमध्ये सर्वाधिक 7,490.24 कोटी रुपये सार्वजनिक बांधकाम विभागाला मंजूर करण्यात आले आहेत, ज्यामध्ये रस्ते, पूल, व इमारती बांधकामाचा समावेश आहे. याशिवाय, मुख्यमंत्री बळीराजा मोफत वीज योजनेसाठी 3,050 कोटी, साखर कारखान्यांना कर्जासाठी 1,204 कोटी आणि दूध उत्पादक शेतकऱ्यांसाठी 758 कोटी रुपयांची तरतूद करण्यात आली आहे.

राज्यातील विविध विकासकामांसाठी हा निधी वापरण्यात येणार असल्याचे मंत्री उदय सामंत यांनी विधानसभेत स्पष्ट केले आहे.