सुनिल तटकरेंना पुन्हा एकदा निवडून आणण्याकरिता नागोठणेकरांनी कंबर कसली

दिनेश ठमके ( सुकेळी) :

महायुतीच्या माध्यमातून रायगड लोकसभेची जागा अजितदादा पवार यांच्या राष्ट्रवादी काँग्रेस पक्षाकडून विद्यमान खासदार तथा राष्ट्रवादीचे प्रदेशाध्यक्ष सुनील तटकरे यांना अधिकृतपणे जाहीर झाल्यानंतर सुनील तटकरे यांना पुन्हा एकदा रायगडचे प्रतिनिधित्व करण्यासाठी पुन्हा एकदा लोकसभेत पाठविण्यासाठी नागोठणे विभागातील राष्ट्रवादी काँग्रेसच्या नेते मंडळींनी, पदाधिकारी यांनी कंबर कसली असून नागोठणे विभागातून जास्तीत जास्त मताधिक्य मिळवून देण्यासाठी विभागातील ग्रामपंचायत निहाय आढावा बैठक घेण्यास सुरुवात केली आहे.

छत्रपती शिवाजी महाराजांच्या पदस्पर्शाने पावन झालेल्या रायगड जिल्ह्यातून विद्यमान खासदार सुनील तटकरे यांच्या रूपाने केंद्रात पंतप्रधान नरेंद्र मोदींना पुन्हा एकदा पंतप्रधान बनविण्यासाठी त्यांचे हात अधिक बळकट करण्यासाठी आणि फिर एक बार मोदी सरकार या संकल्पनेला सत्यात उतरवण्यासाठी सर्वच कार्यकर्ते जोमाने कामाला लागले आहेत. याचवेळी सुनील तटकरे यांचे विशेष प्रेम असलेल्या नागोठणे जिल्हा परिषद मतदार संघात देखील अधिकाधिक मताधिक्य मिळवून देण्यासाठी ग्रामपंचायत निहाय आढावा बैठकांना सुरुवात झाली आहे.

राष्ट्रवादी काँग्रेसचे (अजितदादा पवार गट) पेण सुधागड विधानसभा मतदारसंघाचे अध्यक्ष शिवरामभाऊ शिंदे, भाई टके, रोहा पंचायत समिती माजी सभापती सदानंद गायकर, जेष्ठ नेते मधुकर ठमके, विलास चौलकर यांच्या मार्गदर्शनाखाली नागोठणे येथील राष्ट्रवादी काँग्रेसच्या विभागीय कार्यालयात विभाग अध्यक्ष संतोष कोळी, राष्ट्रवादी युवक काँग्रेसचे जिल्हा सरचिटणीस विनायक गोळे,हिराजी शिंदे,प्रमोद जांबेकर,दिलीप आवाद, यांच्या उपस्थितीत नागोठणे जिल्हा परिषद मतदार संघातील दहा ग्रामपंचायत यातील सरपंच सदस्य कार्यकर्ते यांची बैठक घेण्यास गुरुवार पासून सुरुवात करण्यात आली.

या ग्रामपंचायत निहाय आढावा बैठकांमध्ये उपस्थित ग्रामपंचायत सरपंच सदस्य व कार्यकर्ते यांच्याकडून त्या त्या भागातील परिस्थितीचा आढावा घेऊन यावर चर्चा करण्यात येत आहे. जेणेकरून यातून चर्चा घडवून पुन्हा एकदा रायगडच्या लोकसभेवर सुनील तटकरे यांना नागोठणे विभागातून प्रचंड मताधिक्य देऊन निवडून आणण्यासाठी मदत होईल.

आतापर्यंत विभागातील पळस, पिगोंडे कोंडगाव, वांगणी या ग्रामपंचायत मधील सरपंच, सदस्य, राष्ट्रवादीचे पदाधिकारी यांची आढावा बैठक देण्यात आले असून उर्वरित नागोठणे पाटणसई, ऐनघर,वरवठणे,वणी या सहा ग्रामपंचायतीच्या बैठका येणाऱ्या काळात घेणार असून आमचे नेते सुनील तटकरे यांना जास्तीत जास्त मताधिक्य कसं मिळेल यासाठी प्रयत्नशील असणार आहोत, मात्र यावेळी महायुतीतील घटक पक्षातील विभागातील असलेले नेते , पदाधिकारी व कार्यकर्ते यांना बरोबर घेऊनच प्रचार करणार असल्याचे यावेळी शिवरामभाऊ शिंदे यांनी स्पष्ट केले आहे.