सुकेळी, हेदवली झाले भगवेमय, ‘जय भवानी, जय शिवाजी’च्या जयघोषाने गाव दुमदुमले

सुकेळी ( दिनेश ठमके ) :

अखंड महाराष्ट्राचे आराध्य दैवत तसेच हिंदवी स्वराज्य संस्थापक श्री.छत्रपती शिवाजी महाराजांची जयंती तीथीनुसार जिल्ह्यात उत्साहात साजरी करण्यात आली. नागोठणे जवळच असलेल्या सुकेळी व हेदवली येथे देखिल छत्रपती शिवाजी महाराजांची जयंती भव्यदिव्य स्वरुपात साजरी करण्यात आली. यावेळी ‘जय भवानी, जय शिवाजी’च्या जयघोषाने गाव दुमदुमले.

या दिवशी सकाळपासूनच संपुर्ण सुकेळी व हेदवली गावात भगवेमय वातावरण निर्माण झाले होते. सुकेळी येथे सकाळी अवचित गड येथुन तर हेदवली येथे किल्ले रायगडवरुन शिवज्योतीचे आगमन झाल्यानंतर दोन्ही ठिकाणी सर्व ग्रामस्थांच्या उपस्थितीत शिवज्योतीचे पुजन, शिवाजी महाराजांच्या प्रतिमेला पुष्पहार अर्पण करुन अभिषेक घालण्यात आला. त्यानंतर सत्यनारायणाची पुजा झाल्यानंतर भव्य असा शिवप्रतिमेचा मिरवणूक सोहळा पार पडला.

यावेळी अनेक तरुण मुला – मुलींनी पारंपारीक वेशभूषा व शिवाजी महाराज जिजाऊ माता यांच्या वेगवेगळ्या वेशभूषा साकारल्या होत्या. तसेच शिवाजी महाराजांच्या काळातील पारंपारिक पद्धतीचे खेळ देखिल खेळण्यात आले. पालखी सोहळा पार पडल्यानंतर सुकेळी येथे ऐनघर पंचक्रोशी व नागोठणे पंचक्रोशी यांचे हरिपाठ झाले. शेवटी आलेल्या सर्व शिवभक्तांना गावदेवी मित्र मंडळ यांच्यातर्फे अन्नप्रसाद दिल्यानंतर नवी मुंबई येथिल ह.भ.प. दत्ताराम महाराज परब यांच्या किर्तनाने आलेल्या सर्वांनाच मंत्रमुग्ध करीत या भव्य सोहळ्याची सांगता करण्यात आली.