सायकलवरून पडून जखमी झालेल्या मिहीर चा उपचारादरम्यान मृत्यू, परिसरात हळहळ

अलिबाग/सोगाव ( अब्दुल सोगावकर ) :

अलिबाग तालुक्यातील चोंढी बामणसुरे येथे सोमवार दि. २३ डिसेंबर २०२४ रोजी संध्याकाळच्या वेळी दुःखद घटना घडली, प्रशांत विचारे यांचा नऊ वर्षीय मुलगा मिहीर विचारे हा सायकल वरून पडून जखमी झाला होता, त्याला अधिक उपचारासाठी जिल्हा रुग्णालयात दाखल केले होते, मात्र उपचाराला प्रतिसाद न मिळाल्यामुळे त्याची प्राण-ज्योत मालवली .

याबाबत सविस्तर वृत्त असे की,बामणसुरे येथील प्रशांत विचारे यांचा एकुलता एक मुलगा कु. मिहीर प्रशांत विचारे(वय ९) हा बामणसुरे गावातच सायकल चालवत असताना अचानक तोल जाऊन पडला, काही वेळाने तो आपल्या घरी गेल्यावर अत्यवस्थ झाला, तेव्हा घरातील सदस्यांनी त्याला जवळच्या रुग्णालयात उपचारासाठी दाखल केले, तेव्हा डॉक्टरांनी प्राथमिक उपचार करून पुढील उपचारासाठी मुलाला जिल्हा रुग्णालयात दाखल करण्यास सांगितले.

सदर मुलाला जिल्हा रुग्णालयात उपचारार्थ दाखल करण्यात आल्यानंतर काही वेळाने उपचारादरम्यान प्रतिसाद न मिळाल्याने डॉक्टरांनी शेवटी मृत घोषित केले. त्याच्यावर बामणसुरे स्मशानभूमीत रात्री उशिरा अंत्यसंस्कार करण्यात आले.  याबाबत अधिक तपास पोलीस करत आहेत.