सरपंच पिंट्या गायकवाड छत्रपती शिवाजी महाराज पुरस्कार २०२४’ ने सन्मानित

अलिबाग/सोगांव (अब्दुल सोगावकर ) :

सामाजिक कार्यकर्ता कसा असावा याचे जिवंत उदाहरण म्हणजे रायगड जिल्ह्यात प्रसिद्ध असणारे अलिबाग तालुक्यातील चोंढी येथील सामाजिक कार्यकर्ते व किहीम सरपंच प्रसाद उर्फ पिंट्या सुधीर गायकवाड हे आहेत.

पिंट्या गायकवाड यांच्या सामाजिक कार्याची दखल आजपर्यंत अनेक सामाजिक संस्था व सामाजिक संघटना, विविध राजकीय पक्षांनी घेतली आहे. सामाजिक कार्य करताना प्रसिद्धीच्या झोतापासून ते नेहमीच अलिप्त राहत असतात, मात्र त्यांनी केलेल्या सामाजिक कार्याची माहिती प्रसिद्धी माध्यमांपर्यंत या ना त्या प्रकारे पोहचतेच, त्यांच्या सामाजिक कार्याचे कारणही तसेच असते, जे की माध्यम आपसूकच दखल घेत असतातच. त्यांनी याच सामाजिक कार्याच्या जोरावर मागील पाच वर्षांपूर्वी किहीम ग्रामपंचायत सदस्य पदाची निवडणूक लढवली होती,आणि ते त्यावेळी निवडणूक देखील जिंकले, यादरम्यान त्यांनी आपल्या सामाजिक कार्यामध्ये सातत्य ठेवले. नुकत्याच झालेल्या किहीम ग्रामपंचायतीच्या थेट सरपंच पदाच्या निवडणुकीत अपक्ष उमेदवार म्हणून निवडून येत सर्वांनाच एक सुखद धक्का दिला. असे असले तरी ते हवेत न राहता आपल्या सर्वसामान्य नागरिकांच्या सेवेसाठी २४ तास उपलब्ध असतात.

त्यांच्या या सामाजिक कार्याची दखल घेऊन महाराष्ट्रातील एका नामवंत दैनिकाने आदर्श सामाजिक कार्यकर्ता म्हणून ‘छत्रपती शिवाजी महाराज पुरस्कार २०२४’ हा राज्यस्तरीय पुरस्कार जाहीर केला होता. नुकतेच गुरुवार दि.२८ मार्च २०२४ रोजी सांताक्रूझ-मुंबई येथे झालेल्या एका भव्य कार्यक्रमात सामाजिक कार्यकर्ते व किहीम ग्रामपंचायतीचे सरपंच प्रसाद उर्फ पिंट्या सुधीर गायकवाड यांना त्यांच्या सामाजिक कार्याबद्दल ‘छत्रपती शिवाजी महाराज पुरस्कार २०२४’ हा पुरस्कार महाराष्ट्रातील प्रमुख मान्यवरांच्या हस्ते देण्यात आला. याबद्दल पिंट्या गायकवाड यांचे सर्व स्तरातून कौतुकाचा व अभिनंदनाचा वर्षाव केला जात आहे.

या पुरस्कार सोहळ्याच्या कार्यक्रमात पिंट्या गायकवाड यांच्यासोबत त्यांचे राजकीय व सामाजिक गुरू डॉ. किरण शेटे, प्रदीप पाटील, नदीम आत्तार व मुलगी प्राप्ती गायकवाड हे आवर्जून उपस्थित होते.