शिर्डी साई संस्थानचा मोठा निर्णय: भोजनप्रसादासाठी कूपन अनिवार्य

PEN न्यूज ऑनलाइन टीम : 

शिर्डी साईबाबा संस्थानने साईभक्तांसाठी मोठा निर्णय घेतला आहे. वाढत्या गुन्हेगारीच्या पार्श्वभूमीवर प्रसादालयात मोफत भोजनासाठी कूपन अनिवार्य करण्यात आले आहे. दर्शन रांगेतच हे कूपन वितरित करण्यात येणार असून, भक्त निवासात राहणाऱ्या भक्तांनाही त्याचे वितरण होईल. 

आजपासून पहाटेच्या काकड आरतीनंतर या निर्णयाची अंमलबजावणी सुरू करण्यात आली आहे. यापूर्वी भाविकांना थेट प्रसादालयात प्रवेश मिळत असे, मात्र शिर्डीत झालेल्या दुहेरी हत्याकांडानंतर सुरक्षेच्या दृष्टीने हा बदल करण्यात आला आहे. खासदार सुजय विखे पाटील यांनी वाढत्या गुन्हेगारीबाबत चिंता व्यक्त केल्यानंतर हा निर्णय घेण्यात आला.

दररोज 50 ते 60 हजार भाविक शिर्डी साई प्रसादालयात मोफत भोजनाचा लाभ घेतात. आता मात्र, भोजनासाठी कूपन आवश्यक असेल. भक्तांच्या सुरक्षेसाठी हा निर्णय महत्त्वाचा ठरणार आहे.