वेळास येथील श्री.काळभैरवनाथाच्या होळी उत्सवाचा सोहळा भक्तिमय वातावरणात साजरा !

वेळास-आगर ( संतोष शिलकर ) :

श्रीवर्धन तालुक्यातील मौजे-वेळास येथील ग्रामस्थांच्या हाकेला धावणारा नवसाला पावणारा व पंचक्रोशीतील असंख्य भाविकांचे श्रध्दास्थान असणाऱ्या श्री. काळभैरवनाथाच्या होळी उत्सवाचा सोहळा भक्तिमय वातावरणात साजरा झाला.

 तालुक्यातील पंचतन विभागातील एक श्रद्धास्थान,कर्ता-करविता,सर्वांचा वाली,रक्षणकर्ता,तारणहार,नाथांचा नाथ,श्री.काळभैरवनाथ सकळ जणांच्या रक्षणा ठाई उभा असतो.अशा ग्रामदैवतेचा होळी उत्सव हुतांशनी पौर्णिमा या शुभ-दिनी महायज्ञ, होम,अर्थात मोठी होळी. त्या अगोदर नऊ पिले आणि दहावा होम, दुसऱ्या दिवशी फाल्गुन पौर्णिमा अर्थात धुलीवंदन या दिवशी मंदिरातून श्री.काळभैरव पालखीत बसून होळीकडे प्रस्थांन करतात वाटेत गावातील शिलकर कुटुंबातील मानाच्या घरी पालखी उतरते तिथे मानकऱ्यांच्या घरांतील सदस्यांच्या शुभ-हस्ते पूजा होते.

आजू-बाजूच्या शेजारच्या महिला येऊन पूजन करतात त्यानंतर पालखी होळीस्थानी वळते,जातांना रस्त्यांवरील घरच्या महिला औक्षण करतात. रात्री होमाचे पूजन करून लावलेल्या होमाला पालखीसह भाविक ग्रामस्थ पाच प्रदक्षिणा घालून होळीच्या स्थानावर श्री.काळभैरव आपल्या सहकाऱ्यांसह विराजमान होतात.भाविकांची दर्शनाला ओढ लागते. देवाचा पहारा चालू होतो.दुसऱ्या दिवशी पालखी सोहळा.श्री.भैरवनाथ पालखीत बसून गावात फिरतात,घरोघरी पालखी पोहचते.जय-घोष,मनोभावे पूजन,नवस,गाऱ्हाणे,अशा भक्तिमय वातावरणात पालखी सोहळा.वेळास-आगर आणि मूळ-वेळास या दोन ठिकाणी मंगलमय वातावरणात साजरा होत असतो.डेराचा नाच (गवळी समाज) आणि राधाचा नाच(कुणबी समाज) यांचा मान असतो.डेरा नाच हल्ली काही कारणाने बंद आहे.सर्वांचे एकच श्रद्धास्थान,मात्र दोन ठिकाणी दोन स्थानं आणि दोन पालख्या असतात. त्याचं कार्य निर्विघपणे साजरा होत असतो.

मनोरंजन कार्यक्रम गावाचे सुपुत्र राहुल रामदास मोरे लिखित दोन अंकी नाटक”मू.पो.झकास वाडी”,तेली समाज आयोजित नृत्य स्पर्धा,श्री.काळभैरवनाथ प्रासादिक भजन मंडळ आयोजित “संगीत रजनी”भक्तिगीते,अभंग,गौळण, कव्वाली,अशा सुरेल गायक,गाईका व वादकांची संगीतमय रजनी,भंडारी समाज आयोजित गॅदरिंग,कुणबी समाज आयोजित मुलांचा गुणगौरव आणि हळदी कुंकू कार्यक्रम,तर गोपाळ बाळू भांजी लिखित नाटिका व श्री.हनुमान प्रासादिक भजन मंडळ आयोजित चक्री भजन आणि सांस्कृतिक कार्यक्रम,मुंबई व ग्रामस्थ असे विविध कार्यक्रम आयोजित करून जागर केला.

यावेळी कार्यक्रमात उपस्थित सतकर्मी व कृतिशील महिला पुरुष ग्रामस्थांचा आदर सत्कार केला.असा हा होलिकोउत्सव अर्थात शिमगा उत्साह, मनोरंजक, भक्तिभावे, भक्तिमय वातावरणात डीजे आणि ढोल-ताशाच्या तालावर शनिवार दि.३० मार्च रोजी फाल्गुन कृ.पंचमी अर्थात रंगपंचमीच्या शुभ-दिनी होळीस्थाना वरून श्री.काळभैरवच्या दोनही पालख्या त्यांच्या वरील असंख्य गाण्यांच्या ठेक्यावर,चालींवर होळी शेलवून वाजत,गाजत व आनंदात दोन मंदिरात पोहचल्या आणि दोनही पालखिंचा समारोप अत्यंत उत्साहात व भक्तिमय आणि आनंदी व उत्साही वातावरणात होळी उत्सव अर्थात शिमगा साजरा झाला.