वाकण- रोहा मार्गावर आमडोशी नजिक दुचाकी – टेम्पोची समोरासमोर जोरदार धडक, एक गंभीर जखमी

सुकेळी ( दिनेश ठमके ) :

मुंबई -गोवा महामार्गावर अपघातांची मालिका सुरू असतांनाच ऐन सहा दिवसांच्या बाप्पाच्या विसर्जनाच्या दिवशी वाकण – रोहा मार्गावरील आमडोशी गावाजवळील एका वळणावरती दुचाकी तसेच टेम्पो मध्ये समोरासमोर जोरदार धडक बसून अपघात झाल्याची घटना गुरु .( दि . १२) रोजी दुपारच्या सुमारास घडली. या अपघातात दुचाकीस्वार याला गंभीर स्वरूपाची दुखापत झाली असुन त्यांस पनवेल येथे पुढिल उपचारासाठी पाठविण्यात आले आहे.

याबाबतीत उपलब्ध झालेल्या माहीतीनुसार रेवोली (मेढा) येथे आपल्या नातेवाईकांकडे गणपती बाप्पाच्या दर्शनासाठी गेलेले तामसोली गावातील अतुल भिलारे हे आपल्या वडीलांसह दुचाकी गाडी क्रं. एम. एच. ०६. एफ. २८४७ दर्शनासाठी गेले होते. परंतु दर्शन घेऊन परतत असतानाच वाकण – रोहा मार्गावरील आमडोशी गावाच्या हद्दीमध्ये एका वळणावरती समोरुन येणारा टेम्पो क्रं.एम. एच. ४६. बी.यु. ३०३६ या गाडीला समोरासमोर धडक बसुन भिषण अपघात घडला.

या अपघातात दुचाकीस्वार अतुल भिलारे ( वय- २५) याला गंभीर स्वरूपाच्या दुखापती झाल्यामुळे त्याच्यावर नागोठणे सरकारी रुग्णालयात प्रथमोपचार करुन पुढील उपचारासाठी पनवेल येथे पाठविण्यात आले आहे. तर त्यांचे वडील अनंत शांताराम भिलारे ( वय५०) यांच्यावर किरकोळ उपचार करुन त्यांना घरी सोडण्यात आले आहे. याबाबतीत पुढील तपास नागोठणे पोलीस स्टेशन करीत आहे.