रायगड जिल्ह्यात पहिल्यांदाच “तिहेरी तलाक” गुन्हा दाखल

रायगड (अमुलकुमार जैन) : 

काही दिवसांपूर्वी महाड तालुक्यामधील वहूर मोहल्ला येथील आरोपी मुस्लिम नवरदेव याने पहिली पत्नी असताना दुसरे लग्न करण्याचा प्रयत्न केला. संपूर्ण विषय न्यायप्रविष्ठ असताना नवरदेव मात्र बाशिंग बांधून लग्नाला उभा राहिला होता. या संपूर्ण घटनेची माहिती मिळताच फिर्यादी महिला यांनी आमच्या प्रतिनिधी यांच्याशी संपर्क केला, या संपूर्ण घटनेची दखल घेतली होती.

या बातमीमुळे आरोपी मुस्लिम नवरदेव व त्याच्या कुटुंबात असणाऱ्या मंडळींची पळापळ झाली, तरी देखील मुस्लिम नवरदेव याने इतर ठिकाणी जाऊन दुसरा विवाह केला. पीडित विवाहित महिला नैना अब्दुल रहमान इसाने हिने पती व सासरच्या मंडळी विरोधात महाड एमआयडीसी पोलीस ठाण्यात गुन्हा दाखल केला आहे.

सविस्तर माहिती अशी की, नैना व अब्दुल रहमान इंसाने यांचा विवाह 2022 मध्ये मुस्लिम रीती रिवाजाप्रमाणे झाला होता. यानंतर आरोपी पती याने आपल्या पत्नीस घरी नांदवायला ठेवून परदेशामध्ये कामाला निघून गेला. तसेच घरातील सासू-सासरे यांनी आमचा मुलगा बाहेरगावी कामाला आहे त्याच्या व्यावसायिकरीता 1 करोड रुपये व तुमचा बिरवाडी शहरांमधील असलेला वडिलांचा फ्लॅट आम्हाला दे अशी मागणी पीडित विवाहित महिलेकडे केली.

या सर्व गोष्टीला नैना तयार नसताना घरातील मंडळींनी नैना हिला हाताबुकीने मारहाण करून व तिच्याकडील दागिने हिसकावून घेऊन तिला घराबाहेर हाकलून दिले. यानंतर घरातील इतर आरोपी यांनी बेकायदेशीर रित्या तीन वेळा तलाक, तलाक, तलाक असे बोलून पीडित विवाहित महिला ही आजारी असताना तिला घराबाहेर काढून तिचा शारीरिक व मानसिक छळ केला.

या संपूर्ण घटनेबाबत आरोपी अब्दुल रहमान नदीम इसाने, आरोपी नदीम ईसाने, आरोपी निलोफर नदीम ईसाने, आरोपी सलीम इसाने, आरोपी फिरदोस उर्फ गोमा जाकीर इसाने, सर्व राहणारे वहूर मोहल्ला , तालुका महाड यांच्या विरोधात भारतीय न्याय संहिता 85,115(2),352,351(2),3(5) तसेच मुस्लिम महिला विवाहाचे संरक्षण कायदा 2019 चे कलम 4प्रमाणे गुन्हा दाखल करण्यात आला असून महाड एमआयडीसी पोलीस ठाण्याचे सहाय्यक पोलीस निरीक्षक अनिल जाधव यांच्या मार्गदर्शनाखाली दाखल अंमलदार पोलीस नाईक इकबाल शेख व महिला पोलीस हवालदार एस. उमरटकर या संपूर्ण गुन्ह्याचा अधिक तपास करीत आहेत.
महिलांवर होणाऱ्या अत्याचारा विरोधात नेहमी लढणाऱ्या भाजपा महिला जिल्हाध्यक्षा डॉ. मंजुषा, महामुणकर, बिरवाडी महिला शहर प्रमुख मानसी ताई पवार यांच्या सहकार्याने संबंधित गुन्हा दाखल करण्यात आला आहे.