रायगडमध्ये थंडी वाढली, ठिकठिकाणी शेकोट्या लागल्या पेटू

सुकेळी ( दिनेश ठमके) :

संपूर्ण राज्यासह रायगड जिल्ह्यात देखिल थंडीची चाहुल लागली आहे. थंडीपासून बचाव करण्यासाठी स्वेटर, ब्लॅकेंटच्या खरेदीमध्ये देखिल मोठ्या प्रमाणात वाढ झालेली आहे तर काहींनी ठेवणीत ठेवलेले गरम कपडे आता बाहेर निघु लागले आहेत. तर अनेक ठिकाणी शेकोट्या देखील पेटु लागल्या आहेत.

राज्यात आॅक्टोंबर महिन्यात उकाडा मोठ्या प्रमाणात वाढला होता. नोव्हेंबर महिना सुरु झाला तरी तापमानात मोठी वाढ नोंदविण्यात आली होती. त्यामुळे थंडी कधी पडणार असा प्रश्न सर्वांना पडत होता. मात्र गेल्या काही दिवसांपासून तापमानात मोठी घट झाल्याचे पहायला मिळत असुन थंडीचे प्रमाण हे मोठ्या प्रमाणात वाढलेले पहावयास मिळत आहे.

गेल्या दोन ते तीन दिवसांत रायगड जिल्ह्यात सकाळी आणी रात्री मोठी थंडी जाणवु लागली आहे. त्यामुळे सकाळी शाळेत जाणारी मुले व कामावरती जाणा-या नोकरदार वर्गाला थंडीचा मोठ्या प्रमाणात सामना करावा लागत आहे. त्यामुळे शाळेतील सर्व मुले व नोकरदार हे अंगामध्ये स्वेटर, कानामध्ये टोपी, पायांमध्ये साॅक्स व बुटे घालुन पुर्णतः थंडीपासून आपले संरक्षण करीत आहेत.

तसेच ग्रामीण भागांमध्ये अनेक ठिकाणी रात्रीच्या वेळी थंडीपासून संरक्षण करण्यासाठी शेकोट्या पेटवल्या जात आहेत. त्यामुळे या शेकोट्यांभोवताळी बसुन गावोगावी गावातील लोकांच्या विविध विषयांवर गप्पांची मैफिली रंगत आहेत.