मुंबई गोवा महामार्गावर ऐनघर जवळ शिवशाही बसला अपघात, सुदैवाने कोणतीही जीवितहानी नाही

सुकेळी ( दिनेश ठमके ) : मुंबई -गोवा महामार्गावर ऐनघर गावाच्या हद्दीमध्ये महाड आगाराची नाशिक बाजुकडुन महाडच्या दिशेकडे जाणारी शिवशाही बस डिवार्डरला धडकुन अपघात घडला. या अपघातातील बस जर का पलटी झाली असती तर मोठी दुर्घटना घडली असती . हा अपघात मंगळ. दि. ०२ रोजी सांय. ४.३० वाजण्याच्या सुमारास घडला.

याबाबतीत उपलब्ध झालेल्या माहितीनुसार नाशिकवरुन महाडच्या बाजुकडे जाणारी शिवशाही बस क्रं. एम. एच. ०६ बी. डब्लु. ४३३८ ऐनघर गावाच्या हद्दीमध्ये आली असता समोरुन चुकीच्या बाजुने येणा-या वाहनाला वाचविण्याच्या नांदामध्ये बस चालकाचे आपल्या गाडीवरील नियंत्रण सुटल्यामुळे बस सरळ जाऊन बाजुला असलेल्या डिवार्डरवर चढुन मोरवीच्या कठाड्याला जाऊन जोरदार धडकली. त्यामुळे बस अर्धवट स्थितीत पलटी झाली होती. जर बस पुर्णपणे पलटी झाली असती तर महामार्गावर मोठी दुर्घटना घडली असती.

सुदैवाने या अपघातातील सर्व प्रवासी सुखरूप असुन सर्व प्रवाशांना दुस-या बसने पुढे पाठविण्यात आले. तर बस चालक दत्तात्रय धोंडीबा दराडे (वय- ४५) रा.मुंबई यांना किरकोळ जखम झाली असुन त्यांच्यावर जिंदाल रुग्णालयात उपचार करण्यात आले. दरम्यान या अपघाताचा तपास नागोठणे पोलिस स्टेशन करीत आहेत.