माथेरान येथील मालडुंगा पॉईंटचा भाग ढासळला, धोदाणी ग्रामस्थ भयभीत

matheran-lan-slide
माथेरान ( मुकुंद रांजाणे ) : राज्यात सर्वाधिक पावसाची नोंद माथेरानमध्ये असून २२ जून ते २५ जुलै या कालावधीत एकूण ३६०८ मिलिमीटर इतकी नोंद करण्यात आली आहे. त्यामुळे जंगलात अनेक ठिकाणी झाडे उन्मळून पडली आहेत तर जमिनीची मोठया प्रमाणावर धूप झालेली आहे.
पाण्याचा प्रवाह प्रचंड असल्याने कड्यालगत असणारी माती वाहून गेल्यामुळे येथील मालडुंगा पॉईंट्सचा काहीसा भाग ढासळल्याने दरड, माती अन झाडीसह डोंगरातुन खाली मोठया आवाजासह वाहून गेला. याच डोंगराच्या पायथ्याशी धोदाणी ही आदिवासी वाडी आहे.
सायंकाळच्या दरम्यान हा प्रकार घडल्याने धोदाणी गावचे ग्रामस्थ भयभीत झाले होते. कारण नुकताच चौक येथील इरसाळवाडी अशाच दरडी खाली नेस्तनाबूत झाली होती त्यामुळेच सर्वच ठिकाणी या अतिवृष्टीमुळे वाड्यातील लोक सतर्क झाले आहेत.
आज सकाळी नगरपरिषदेच्या आपत्कालीन विभागातील अधिकारी, कर्मचारी वर्गाने  मालडुंगा पॉईंट आणि त्याबाजूला असणाऱ्या एल्फिन्स्टन बंगल्याची पाहणी केली आहे. एल्फिन्स्टन बंगल्याच्या कंपाऊंड मध्ये आठ ते दहा फुटांचे चरे पडले असून दोनशे मीटर भाग पूर्णपणे खचला आहे त्यामुळे आगामी काळात अतिवृष्टीमुळे हा भाग केव्हाही आजूबाजूला असणाऱ्या झाडीसह डोंगरात कोसळण्याची दाट शक्यता आहे. मागील २००६ मधील २६ जुलैची पुनरावृत्ती ह्या एलफिन्स्टन बंगल्याची परिस्थिती पाहून दिसून येत आहे.
याचबरोबर माथेरान मधील कड्यालगत असणाऱ्या नागरी वस्तीतील लोकांना सुरक्षेची काळजी घेण्याबाबत सूचना तसेच घरे खाली करून सुरक्षित स्थळी आपला मुक्काम हलवा अशा नोटिसा बजावल्या आहेत. तर मालडुंगा पॉईंट्स चा रस्ता अत्यंत खराब झाल्याने तो रहदारी साठी बंद करण्यात आला आहे.

Leave a Reply

Your email address will not be published. Required fields are marked *

WA_Adv_001-copy

आपण हि बातमी कॉपी करू शकत नाही.

Discover more from Pen News

Subscribe now to keep reading and get access to the full archive.

Continue reading