माथेरान मधील स्वच्छता कर्मचाऱ्यांचा ‘काम बंद’चा पवित्रा

कर्जत ( गणेश पवार ) : 

माथेरान गिरिस्थान नगरपरिषद व ठेकेदाराकडून दिवाळी बोनस न दिल्याने माथेरान या जगप्रसिद्ध पर्यटनस्थळाला स्वच्छ व सुंदर ठेवणाऱ्या स्वच्छता कर्मचाऱ्यांची यंदाची दिवाळी अंधारमय अवस्थेमध्ये जाणार आहे. बोनस न दिल्याने स्वच्छता कर्मचारी यांचे काम बंद, प्रशासनाच्या भूमीकेकडे काम बंद कर्मचाऱ्यांचे लक्ष, प्रशासन स्वच्छता कर्मचाऱ्यांची दिवाळी गोड काणार का? असा प्रश्न मात्र उपस्थित केला जात आहे.

 माथेरानचे रस्ते,पॉईंट, कडेकपाऱ्या, जंगलामध्ये फिरून पर्यटकांनी टाकलेला कचरा गोळा करून त्याची विल्हेवाट लावणाऱ्या ६० कर्मचाऱ्यांची दिवाळी अंधारमय जाणार असल्याने नाराज कर्मचार्यांनी पालिकेकडे बोनस मिळावा म्हणून त्यांच्या युनियनच्या माध्यमातून पाठपुरावा केला पण त्याला यश आले नाही.अखेर युनियनचे सल्लागार दिनेश सुतार यांनी आजपासून काम बंद करून गरिबांची दिवाळी गोड साजरी होण्यासाठी प्रशासनाचे लक्ष वेधण्यासाठी कचरा संकलन काम बंद केले आहे.

या कर्मचार्यांना दरवर्षी दिवाळी बोनस मिळतो. यावर्षी ठेकेदाराकडून तसेच पालिकेकडून कोणतीही सकारात्मक पाऊले उचलली गेली नाहीत त्यामुळे या गरीब आदिवासी कर्मचाऱ्यांची दिवाळी ही अंधारात जाणार आहे. मुख्याधिकारी इकडे लक्ष देत नाहीत. त्यामुळे नाईलाजास्तव काम बंद करत आहोत. आम्ही हे आंदोलन करत नसून अधिकाऱ्यांचे लक्ष वेधण्यासाठी काम बंद केले आहे. स्वच्छता विभाग, बांधकाम विभाग व माळी कामगार यांनी एकत्र येत हे काम बंद केले आहे. याकडे प्रशासनाने गांभीर्याने लक्ष द्यावे.अन्यथा आचारसंहिता संपल्यानंतर  मोठे आंदोलन उभारले जाईल. असे दिनेश सुतार यांनी सांगितले आहे.

यावेळी महाराष्ट्रातील सामाजिक कार्यकर्त्या तसेच बिग बॉस फेम तृप्ती देसाई या माथेरानमध्ये फिरण्यासाठी आल्या असताना सर्व कर्मचारी बसलेले पाहून त्यांनी या कामगारांकडे विचारणा केली. त्यावेळी हा सर्व प्रकार त्यांना कळल्यानंतर त्यांनी प्रशासनाविरोधात तीव्र नाराजी प्रकट केली.

–————————————————

गरीबाची दिवाळी रंगीन करण्यापेक्षा त्यांची गळचेपी करून ठेकेदारांची भरभराट करून प्रशासन काय साध्य करणार हे बरोबर नसून जे माथेरान स्वच्छ व सुंदर ठेवण्यासाठी प्रामाणिक काम करतात त्यांना त्यांचा अधिकार न देणे म्हणजे प्रशासनाची अरेरावी आहे.पालिका प्रशासनाने याकडे गांभीर्याने लक्ष देणे गरजेचे आहे.

…तृप्ती देसाई, भूमता ब्रिगेड, संस्थापिका

————————————————

माथेरान गिरिस्थान नगरपरिषदेचे मुख्य कार्यकारी अधिकारी राहुल इंगळे कार्यालयात उपस्थित नसल्याने कामगारांच्या काम बंद समस्या सोडविण्या संदर्भात अधिकृत माहिती आम्हाला देता येत नाही.

…सदानंद इंगळे, कार्यालय अधिक्षक, माथेरान गिरिस्थान नगरपरिषद,