माथेरानमध्ये मान्सूनपूर्व कामांना गती ! नगरपरिषदेच्या अधिकारी वर्गासह कर्मचार्‍यांनी कसली कंबर

माथेरान ( मुकुंद रांजाणे ) : माथेरान मध्ये मान्सून पूर्व कामांना गती मिळाली असून नगरपरिषदेच्या कामगारां मार्फत गटारे त्याचप्रमाणे ज्या ज्या ठिकाणी पावसाळी पाण्याचा निचरा होण्यासाठी उपाययोजना करावी लागते त्या भागात जाऊन गटारांची साफसफाई युद्धपातळीवर सुरू झाली आहे.

माथेरानमध्ये पावसाचे प्रमाण अधिक असून उन्हाळ्यात याच गटारात साचला जाणाऱ्या कचऱ्यामुळे गटारे भरून जातात याकामी या गटारातील सर्व प्रकारचा कचरा व्यवस्थित काढून गटारे उत्तम प्रकारे स्वच्छ केली जात आहेत त्यामुळे पावसाळी पाण्याचा निचरा होऊन पावसाळी पाणी रस्त्यावरून वाहणार नाही याची खात्री संबंधीत विभागाचे अधिकारी करत आहेत.

ज्या ठिकाणी मातीचे रस्ते आहेत त्या ठिकाणी दगड मातीचे बंधारे टाकून पावसाळी पाणी गटाराच्या दिशेने जाऊन रस्त्यांची धूप होणार नाही याची सुध्दा काळजी घेतली जात आहे.वस्ती भागातील सुध्दा गटारे व्यवस्थित साफ करण्यास सुरुवात झाली आहे.

अनेक नागरिकांची स्वछ्तेच्या बाबतीत मानसिकता नसल्याने अशी मंडळी ओला सुका कचरा आजूबाजूला असणाऱ्या गटारात, नाल्यात टाकतात त्यामुळे काही ठिकाणी वस्तीच्या भागात दुर्गंधीचे साम्राज्य पसरलेले असते एकंदरीत मान्सून पूर्व स्वच्छता मोहिमेला नगरपरिषदेच्या माध्यमातून सुरुवात झाली असून शहरात स्वच्छता राखण्यासाठी नगरपरिषदेच्या अधिकारी वर्गासह कर्मचारी वर्गाने कंबर कसली आहे.