माथेरानमध्ये ई रिक्षा ठेकेदाराच्या धूर्त कारभाराची पोलखोल !

कर्जत ( गणेश पवार ) :

पायलट प्रोजेक्ट असला तरी माथेरानमध्ये ई रिक्षा या पर्यटक व माथेरानकर नागरिक यांच्यासाठी महत्त्वपूर्ण ठरल्या आहेत. मात्र या ई रिक्षांच्या वापरासाठी आकारल्या जाणाऱ्या दराच्या पावत्यांमध्ये घोळ असल्याची बाब माजी नगरसेवक दिनेश सुतार यांनी समोर आणली आहे.

 माथेरान नगरपालिकेची मालमत्ता असलेले शिक्के हे चक्क ई रिक्षा स्थानकावरच्या कर्मचाऱ्यांकडे आढळून आल्याने यात काही काळाबाजार आहे का ? असा संशय निर्माण झाला आहे.

माथेरानमधील ब्रिटिश कालीन हात रिक्षांची अमानुष प्रथा बंद होण्यासाठी माथेरानमधून बंड झाले. हात रिक्षा संघटनेने सुनील शिंदे व इतर काही सामाजिक कार्यकर्त्यांच्या सहकार्याने ही लढाई सर्वोच्च न्यायालयात लढली. त्याला यश येत न्यायालयाने माथेरानमध्ये डिसेंबर २०२२ मध्ये ३ महिन्यांसाठी प्रायोगिक तत्त्वावर ई रिक्षाला परवानगी दिली. त्यानंतर ३ महिन्यांनी मुदत संपल्याने रिक्षा बंद झाल्या होत्या. तर माथेरान सनियंत्रण समितीने ई रिक्षा सर्वांसाठी उपयुक्त असल्याचा अहवाल सर्वोच्च न्यायालयात सादर केल्यानंतर रिक्षा पुन्हा सुरू झाल्या.

मात्र सुरवातीला नियमात चालणाऱ्या या ई रिक्षा बाबत आता ठेकेदाराकडून काळाबाजार होत असल्याचा प्रकार समोर आला आहे. माथेरान दस्तुरी नाका व माथेरान बाजारपेठ येथे ई रिक्षाच्या स्थानकावर प्रवाशांना ई रिक्षाला प्रवासासाठी ३५ रुपये मोजावे लागतात. त्यासाठी माथेरान नगरपरिषदेचे शिक्के असलेली पावती प्रवाशांना दिली जाते. मात्र माजी नगरसेवक दिनेश सुतार यांनी एक अजब प्रकार समोर आणला आहे.

प्रवाशांना दिल्या जाणाऱ्या पावत्यांवर शिक्केच काय तर साधी तारीख देखील नाही. तर माथेरान नगरपरिषदेची मालमत्ता असलेले शिक्के हे ठेकेदाराच्या कर्मचाऱ्यांकडे मिळाले आहेत. ई रीक्षाच्या उत्पन्नातून नगरपरिषद व ठेकेदार यांच्यात ६०/ ४० चा करार करण्यात आला आहे. मात्र या रिकाम्या पावत्यांमुळे नगरपरिषदेचा आंधळा कारभार उघडा पडला आहे.

नगरपरिषदेचे मुख्याधिकारी राहुल इंगळे यांनी याबाबत आपण चौकशी करणार असल्याची सारवासारव केली आहे. माजी नगरसेवक दिनेश सुतार यांनी ठेकेदाराच्या धूर्त कारभाराची पोलखोल केली आहे. मात्र माथेरान नगरपरिषद यावर चौकशी कारवाई करणार का ? तर या व्हिडिओतून एक विदारक सत्य समोर आल्याने थेट माथेरान सनियंत्रण समिती ठेकेदाराला बरखास्त करणार का हे पाहणे महत्त्वाचे ठरणार आहे.