
उरण ( विठ्ठल ममताबादे ) :
रायगड जिल्हा काँग्रेसचे अध्यक्ष व कामगार नेते महेंद्रशेठ घरत आणि त्यांच्या पत्नी शुभांगीताई महेंद्रशेठ घरत यांनी रयत शिक्षण संस्थेस ५१ लाख रुपयांची देणगी दिली.
या योगदानाबद्दल रयत शिक्षण संस्थेच्या वतीने सातारा येथे रविवार, २२ सप्टेंबर २०२४ रोजी, रयत शिक्षण संस्थेचे संस्थापक पद्मभूषण डॉ. कर्मवीर भाऊराव पाटील यांच्या १२७ व्या जयंतीनिमित्त विशेष सत्कार करण्यात आला.
सत्कार समारंभाचे आयोजन कर्मवीर समाधी परिसरात करण्यात आले होते, आणि संस्थेचे अध्यक्ष मा. शरदचंद्रजी पवार यांच्या शुभहस्ते महेंद्रशेठ घरत यांचा गौरव करण्यात आला. या प्रसंगी संस्थेचे चेअरमन आणि कर्मवीर अण्णांचे नातू डॉ. अनिल पाटील, साताऱ्याचे माजी खासदार श्रीनिवास पाटील, रायगडचे माजी खासदार रामशेठ ठाकूर तसेच रयत शिक्षण संस्थेचे देशभरातील पदाधिकारी, शिक्षक, कर्मचारी आणि विद्यार्थी मोठ्या संख्येने उपस्थित होते.