महाविकास आघाडीचा मीच अधिकृत उमेदवार : अतुल म्हात्रे यांचा पत्रकार परिषदेत दावा

PEN न्यूज ऑनलाइन टीम : 

अलीबाग, पेण व पनवेल विधानसभा मतदारसंघ हे शेकापच्या उमेदवारांसाठी सोडले असल्याचे वक्तव्य शिवसेना उद्धव बाळासाहेब ठाकरे पक्षाचे  पक्षप्रमुख उद्धव  ठाकरे व राष्ट्रवादी शरदचंद्र पवार पक्षाचे शरद पवार यांनी सोमवारी दुपारी दोन वाजता संयुक्त पत्रकार परिषद घेऊन केले असल्याने अधिकृत उमेदवार मीच आहे असा दावा पेण येथे आयोजित पत्रकार परिषदेत शेकापचे अतुल म्हात्रे यांनी केला.

या पत्रकार परिषदेला शेतकरी कामगार पक्षाचे महादेव दिवेकर, नंदकुमार म्हात्रे, मंगेश पाटील , वडखळ चे माजी उपसरपंच निलेश म्हात्रे यांचासह शेतकरी कामगार पक्षाचे नेते व कार्यकर्ते उपस्थित होते.

भाजपाची बी टीम सज्ज

कालपर्यंत भाजपचे विधानसभा प्रमुख म्हणून पद मिरवणाऱ्या उमेदवाराने नंतर अपक्ष असल्याची घोषणा केली व अचानक महाविकास आघाडीच्या घटक पक्षाचे चिन्ह घेऊन निवडणुकीच्या रिंगणात उतरले आहेत हे उमेदवार महाविकास आघाडीचे नसून ही भाजपची बी टीम आहे असा आरोप यावेळी अतुल म्हात्रे यांनी केला. थोडक्यात ही लढाई महाविकास आघाडी विरुद्ध महायुतीची आहे असेही ते म्हणाले.

विद्यमान नेतृत्व निष्क्रिय

191 पेण सुधागड मतदार संघाचे विद्यमान नेतृत्व हे निष्क्रिय असल्याने जनतेमध्ये त्यांच्या विरोधात नाराजी आहे मतदार संघाचा विकास करण्यात ते अपयशी ठरले आहेत. आजही या मतदार संघात रोजगार, पाणी, रस्ते असे अनेक प्रश्न आहेत. मुंबई गोवा महामार्ग मागील 14 वर्षात बनला नाही. पेण खारेपाट विभागातील पाण्याचा प्रश्न आजही प्रलंबित आहे.

विकासासाठी आग्रही 

गडब विभागात होऊ घातलेली एमआयडीसी व त्यामुळे शेतकऱ्यांवर आलेले संकट तसेच एम एम आर डी ए अंतर्गत येणारे विविध प्रकल्प व त्यामुळे येथील शेतकरी देशोधडीला लागणार आहे. त्यांना विकासाच्या प्रवाहात आणण्याकरिता एक सक्षम व दूरदृष्टी असणारा आमदार आवश्यक आहे व त्यामुळे मला या आमदारकीच्या निवडणूकीत येथील जनता निश्चित निवडून देईल असा विश्वास अतुल म्हात्रे यांनी यावेळी व्यक्त केला.