मंत्री गोगावले यांच्या हस्ते संतश्रेष्ठ माऊली ज्ञानेश्वर मंदिरांचे उदघाटन

पोलादपूर (शैलेश पालकर) :

तालुक्यातील साखर गावातील खडकवाडी येथील संतश्रेष्ठ माऊली ज्ञानेश्वर मंदिरांचे नूतनीकरण व  उदघाटन सोहळा सदगुरू तपोनिधी गणेशनाथ महाराज संस्थानाचे सदगुरू श्रीअरविंदनाथ महाराज यांच्या प्रमुख उपस्थितीत राज्याचे रोहयो, फलोद्यान व खारलॅण्ड मंत्री ना.भरत गोगावले यांच्याहस्ते करण्यात आला.

याप्रसंगी ना.गोगावले यांच्यासोबत माजी उपाध्यक्ष चंद्रकांत कळंबे, गणपत उतेकर, तालुकाप्रमुख निलेश अहिरे, कृउबा समिती संचालक लक्ष्मण मोरे, लक्ष्मण खेडेकर, संजय मोदी, शंकर बांदल, बाळकृष्ण उतेकर, ज्ञानोबा मालुसरे तसेच अन्य मान्यवर उपस्थित होते.

सदगुरू तपोनिधी गणेशनाथ महाराज संस्थानाचे सदगुरू श्रीअरविंदनाथ महाराज यांच्यासह ना.गोगावले यांनी छत्रपती शिवाजी महाराजांच्या अर्धपुतळयास अभिवादन केल्यानंतर वाद्यांच्या निनादामध्ये मिरवणूकीने प्रमुख पाहुणे यांचे श्रीसंतश्रेष्ठ ज्ञानेश्वर माऊलींच्या मंदिरापर्यंत आगमन झाले. सदगुरु तपोनिधी गणेशनाथ महाराज संस्थानं आळंदी आणि संत ज्ञानेश्वर सेवा मंडळ खडकवाडी संचलित अखंड हरिनाम सप्ताहाचे आयोजन करण्यात आले असता संतश्रेष्ठ माऊली ज्ञानेश्वर मंदिरांचे नूतनीकरण व उदघाटन सोहळयाप्रसंगी पोलादपूर तालुक्यातील लोकप्रतिनिधी पदाधिकारी, भाविक मंडळी मोठया संख्येने उपस्थित होते.