भारताचे माजी पंतप्रधान डॉ. मनमोहन सिंग पंचत्वात विलीन; शासकीय इतमामात अंत्यसंस्कार

नवी दिल्ली : 

भारताचे माजी पंतप्रधान डॉ. मनमोहन सिंग यांचे २६ डिसेंबर रोजी निधन झाले. ९२ वर्षीय सिंग यांनी दिल्लीतील एम्स रुग्णालयात अखेरचा श्वास घेतला. आज (शनिवार) दिल्लीतील निगम बोध घाटावर त्यांच्या पार्थिवावर शासकीय इतमामात अंत्यसंस्कार करण्यात आले. त्यांच्या मुलींनी अंत्यसंस्कार केले.

राष्ट्रपती द्रौपदी मुर्मू, उपराष्ट्रपती जगदीप धनखड, पंतप्रधान नरेंद्र मोदी, सोनिया गांधी, राहुल गांधी, मल्लिकार्जुन खरगे यांच्यासह अनेक नेत्यांनी त्यांना श्रद्धांजली वाहिली. त्यांच्या स्मरणार्थ केंद्र सरकारने सात दिवसांचा राष्ट्रीय दुखवटा जाहीर केला आहे.

मनमोहन सिंग यांनी २००४ ते २०१४ दरम्यान पंतप्रधानपद भूषवले. देशाच्या अर्थव्यवस्थेत योगदान देत त्यांनी आर्थिक सुधारणांचा पाया रचला. आरटीआय, आरटीई, मनरेगा, शेतकरी कर्जमाफी, आणि माहिती क्रांतीसाठी त्यांनी महत्त्वपूर्ण निर्णय घेतले.