बाळसई येथे श्री.बेलजाई मातेचा पालखी सोहोळा उत्साहात साजरा

सुकेळी ( दिनेश ठमके) : संपूर्ण रायगड जिल्ह्यासह रोहा तालुक्यात नावलौकिक असलेल्या तसचे अनेक कार्यक्रम उत्कृष्टपणे पार पाडत असलेल्या श्री.क्षेत्र बाळसई येथिल तसेच नवसाला पावणा-या श्री.आई बेलजाई मातेच्या १० व्या वर्धापन दिनानिमित्त श्री. बेलजाई मातेचा पालखी सोहोळा भव्यदिव्य अशा उत्साही वातावरणात संपन्न झाला. यावेळी मा. आ.अनिकेत तटकरे व जेष्ठ नेते भाई टक्के यांनी या पालखी सोहोळ्याला उपस्थित राहुन आई बेळजाई मातेच्या पालखीचे दर्शन घेतले.

या कार्यक्रमाची सुरुवात सकाळी श्री.आई बेलजाई मातेच्या मुर्तीवर दुग्ध अभिषेक व होम हवन करुन करण्यात आली. त्यानंतर सांय . ५ वा. श्री. बेलजाई मातेच्या पादुकांची फुलांनी सजवलेल्या पालखीतून संपुर्ण बाळसई गावातुन मिरवणूक काढण्यात आली. बेन्जोंच्या ताळावर तसेच फटाक्यांच्या आतषबाजीत गावातील सर्व महिला, तरुण- तरुणी, अबालवृद्ध मोठ्या उत्साहाने पालखी सोहळ्यात नाचण्यात दंग झाल्या होत्या. यावेळी श्री . बेलजाई मातेच्या नामघोषाने संपुर्ण बाळसई गाव दणाणून गेले होते. या सोहोळ्यासाठी मुंबई, ठाणे, पुणे येथे कामाच्या निमित्ताने राहणारे चाकरमानी तसेच माहेरवाशिणी आवर्जून येत असतात.

पालखी सोहोळा मंदिरात गेल्यानंतर आरती घेण्यात आली. त्यानंतर या पालखी सोहोळ्यासाठी आलेल्या भाविकांना महाप्रसाद देण्यात आला. शेवटी मुंबई येथुन आलेल्या कलाकारांनी सुंदर अशी पारंपारिक व सांस्कृतिक गाणी बोलत तसेच नृत्य सादर करीत सर्वच उपस्थितांची मने जिंकली. यावेळी या कार्यक्रमाला उपस्थित असलेले डोंबिवली (मुंबई) येथिल भाजपचे नगरसेवक विकास म्हात्रे, पेण- सुधागड विधानसभा प्रमुख प्रसाद दादा भोईर, भाजपाचे दक्षिण रायगड जिल्हा उपाध्यक्ष सोपानभाऊ जांबेकर, नागोठणे पोलिस स्टेशनचे सहाय्यक पोलिस निरीक्षक हरेष काळसेकर, माजी सभापती सदानंदजी गायकर, विनोद पाटील, डोंबिवली येथिल सरोवर नगरचे अध्यक्ष प्रकाश मोरे, सामाजिक कार्यकर्ते जयराम झोलगे, पत्रकार अॅड. महेश पवार, बाळसई गावचे अध्यक्ष मधुकर ठमके आदी मान्यवरांचा यावेळी बाळसई ग्रामस्थांच्या तसेच मुंबई मंडळाच्या वतिने सन्मान करण्यात आला. हा कार्यक्रम यशस्वी करण्यासाठी बाळसई गावचे अध्यक्ष मधुकर ठमके यांच्या मार्गदर्शनाखाली ग्रामस्थ मंडळ, महिला मंडळ, मुंबई मित्र मंडळ तसेच आई बेलजाई मित्र मंडळ यांनी मेहनत घेतली.