पोलादपूर शहरात श्री सदस्यांकडून स्वच्छता अभियान; ना.गोगावले यांचाही सहभाग, पत्रकार पालकरांकडून समारोप

पोलादपूर :

महाराष्ट्र भूषण डॉ. श्री. नानासाहेब धर्माधिकारी यांच्या जन्मशताब्दी निमित्त डॉ. श्री. नानासाहेब धर्माधिकारी प्रतिष्ठान, रेवदंडा यांच्यामार्फत प्रतिष्ठानचे विश्वस्त पद्मश्री डॉ. आप्पासाहेब धर्माधिकारी, डॉ. श्री. सचिन दादा धर्माधिकारी, उमेश दादा धर्माधिकारी व राहुल दादा धर्माधिकारी यांच्या मार्गदर्शन आणि प्रेरणेतून पोलादपूर येथील श्रीसदस्यांनी महास्वच्छता अभियानाचे यशस्वी आयोजन केले.

याप्रसंगी रोहयो मंत्री ना.भरत गोगावले आणि पोलादपूर नगरपंचायतीच्या नगराध्यक्षा सोनाली गायकवाड, उपनगराध्यक्ष प्रसाद इंगवले व नगरसेविका तसेच विविध क्षेत्रातील मान्यवरांनी महास्वच्छता मोहिमेमध्ये सहभाग घेतला. महाराष्ट्र राज्य पत्रकार संघाचे कोकण विभागीय अध्यक्ष ज्येष्ठ पत्रकार शैलेश पालकर यांच्या प्रमुख उपस्थितीत मोहिमेचा समारोप पोलादपूर तहसिल कार्यालयाच्या प्रांगणात झाला.  यावेळी पोलादपूर शहरामधून 2650 किलो सुका व 1100 किलो ओल्या कचऱ्याची स्वच्छता व विल्हेवाट लावण्यात आली.

पोलादपूर शहरातील श्री समर्थ बैठक हॉल परिसर, भैरवनाथ मंदिर व विद्यामंदिर परिसर, पंचायत समिती परिसर तसेच नगरपंचायत व तहसील कार्यालय परिसर, भैरवनाथ नगर, पोलादपूर बाजारपेठ, तसेच मुंबई – गोवा रस्त्याच्या दुतर्फा सदर स्वच्छता अभियान राबवण्यात आले. या महास्वच्छता अभियानामध्ये महाराष्ट्राचे रोजगार हमी, फलोत्पादन व खारभूमी विकास मंत्री ना.भरत गोगावले हे देखील स्वच्छता करण्यासाठी सक्रीय सहभागी झाले.

यावेळी मनोगत व्यक्त करताना ना.गोगावले यांनी, डॉ. श्री. नानासाहेब धर्माधिकारी प्रतिष्ठानच्या वतीने नेहमीच कोणतेही अपेक्षा न ठेवता आरोग्य तपासणी शिबिर, बंधारे निर्मिती, रक्तदान शिबिर, वृक्षारोपण यांसारखे समाजोपयोगी कार्यक्रम नेहमीच राबवले आहेत, असे मत व्यक्त करून या महास्वच्छता अभियानाबद्दलही सर्व श्री सदस्य आणि नागरिक बंधू-भगिनी अभिनंदनास पात्र असल्याचे यावेळी कौतुक केले.

सकाळी साडे आठ ते दुपारी साडेबारा वाजेपर्यंत 162 श्रीसदस्यांच्या उपस्थितीत सुरू असलेल्या महास्वच्छता मोहिमेचा समारोप महाराष्ट्र राज्य पत्रकार संघाचे कोकण विभागीय अध्यक्ष ज्येष्ठ पत्रकार शैलेश पालकर यांच्या प्रमुख उपस्थितीत झाला. यावेळी शैलेश पालकर यांनी, पोलादपूर शहरात गेल्या काही वर्षांपासून सुरू असलेल्या या एकदिवसीय उपक्रमापासून वर्षाचे सर्वच दिवस कचरा करणाऱ्या पोलादपूरवासियांनी धडा घेण्यासारखी बाब असून घरातील कचरा परिसरात न टाकता घंटागाडीमध्येच जाईल, याची दररोज दक्षता घेतली तर श्रीसदस्यांना अन्य सामाजिक उपक्रम राबविण्याची संधी मिळेल. कचरा करण्याची वृत्ती पालटण्यासाठीे तसेच परिसर स्वच्छता राखण्याची सवय अंगी बाणण्यासाठी पोलादपूरवासियांच्या मनाचे समुपदेशन श्रीसदस्यांनी नजिकच्या काळात करण्यासाठी गरज यावेळी पत्रकार पालकर यांनी प्रतिपादन केली. यावेळी डॉ.श्री.नानासाहेब धर्माधिकारी प्रतिष्ठान, रेवदंडा यांचे आणि श्रीसदस्यांचे शैलेश पालकर यांनी हात जोडून आभार मानले.

या महास्वच्छता मोहिमेमध्ये नगरसेविका शिल्पा दरेकर व स्नेहा मेहता, नगरपंचायत शहर समन्वयक गार्गी रेगे,महिला कमिटी सदस्य सुमन महाडीक, सेवानिवृत्त कर्मचारी अध्यक्ष सुरेंद्र जाधव, पोलीस हवालदार स्वप्नील जाधव, पोलीस नाईक अनुजित शिंदे, पोलीस शिपाई प्रशांत खानविलकर तसेच विविध क्षेत्रातील मान्यवर सहभागी झाले.