पोलादपूर व सवाद येथे संचलनाने सुसज्जता दाखवित पोलीसांनी नागरिकांना केले आश्वस्त

पोलादपूर ( शैलेश पालकर ) :

पोलादपूर पोलीस ठाण्याच्या हद्दीतील पोलादपूर शहरात तसेच सवाद ग्रुपग्रामपंचायत हद्दीत पोलीसांनी सशस्त्र संचलन करून विधानसभा निवडणूक 2024 च्या पार्श्वभूमीवर सुसज्जता दाखवित पोलीसांनी नागरिकांना आश्वस्त केले आहे.

पोलादपूर शहरातील मुख्य बाजारपेठ तसेच मुंबई गोवा महामार्गावरील पूर्व तसेच पश्चिमेकडील सर्व्हिस रोड, बाजारपेठ, जुना महाबळेश्वर रस्ता या मार्गावरून पोलीसांनी संचलन करून मतदारांना कोणताही अनुचित प्रकार निवडणूक काळात होणार नसल्याचे आश्वस्त केले आहे. पोलादपूर पोलीस ठाण्याचे 02 अधिकारी आणि 08 कर्मचारी तसेच गोवा सॅप सी कॉय सशस्त्र पथकाचे 02 अधिकारी 44 कर्मचारी यांच्या उपस्थितीत हा रूट मार्च काढण्यात आला.

सवाद येथे महायात्रेच्या पार्श्वभूमीवर रूट मार्च

आगामी विधानसभा निवडणूकीच्या पार्श्वभूमीवर तसेच पोलादपूर तालुक्यातील सवाद येथे आज 15 नोव्हेंबर रोजी कार्तिक त्रिपुरारी पौर्णिमेला आयोजित करण्यात आलेल्या श्रीशंकराच्या महायात्रेच्या पार्श्वभूमीवर गुरूवारी दुपारी पोलादपूर पोलिसांसह गोवा सॅप सी कॉय सशस्त्र पोलीसांचा रुट मार्च काढण्यात आला.

जत्रोत्सवाच्या रात्री कुठलाही अनुचित प्रकार घडू नये, शांतता, सुव्यवस्था कायम रहावी, या उद्देशाने सवाद गावात तसेच निवडणुकीच्या पार्श्वभूमीवर पोलादपूर शहरात पोलिस निरीक्षक अनिल जाधव यांच्या मार्गदर्शनाखाली पोलिसांचा रुट मार्च काढण्यात आल्याचे यावेळी स्थानिय गुन्हे अन्वेषण विभागातर्फे सांगण्यात आले.