पोलादपूर येथे शनिवारी आजी-माजी सैनिकांचा मेळावा ! माजी सैनिक आणि वीरपत्नींचाही होणार सन्मान; आ.गोगावले यांच्यामुळे विश्रामगृहाला सव्वाकोटींचा निधी 

पोलादपूर ( शैलेश पालकर ) : सैन्यदलात शौर्य गाजविण्यासह सेवा बजाविणाऱ्या आजी-माजी सैनिकांच्या विश्रामगृहाच्या जीर्ण अवस्थेमुळे होणारी गैरसोय लक्षात घेऊन महाड विधानसभा मतदार संघाचे आमदार भरत गोगावले यांनी राज्यसरकारच्या माध्यमातून पोलादपूर येथील विश्रामगृहाच्या नूतनीकरणासाठी तब्बल सव्वा कोटींचा निधी उपलब्ध केला आहे.

याप्रसंगी आमदार भरत गोगावले यांच्या प्रमुख उपस्थितीत शनिवार, दि.20 मे 2023 रोजी कॅप्टन विक्रमराव मोरे सभागृहामध्ये माजी सैनिक आणि वीरपत्नींचाही सन्मान सोहळा आयोजित करण्यात आला असून कर्नल किशोर मोरे यांचा विशेष सत्कार करण्यात येणार आहे.

याप्रसंगी माजी राजिप सदस्य चंद्रकांत कळंबे, लेफ्टनंट कर्नल राहुल माने, प्रांताधिकारी प्रतिमा पुदलवाड, सहायक जिल्हा सैनिक कल्याण अधिकारी सुभेदार गोविंदराव साळुंखे, प्रभारी तहसिलदार समीर देसाई, नगराध्यक्षा सोनाली गायकवाड, सहायक पोलीस निरिक्षक युवराज म्हसकर, गटविकास अधिकारी धनंजय जगताप, नगरपंचाय मुख्याधिकारी कोमल कराळे आदी मान्यवर उपस्थित राहणार आहेत.

पोलादपूर तहसिल कार्यालयालगत सैनिक विश्रामगृह असून या इमारतीची दूरवस्था वाढत असल्याने माजी सैनिकांची मोठया प्रमाणात तालुक्याच्या शहरात आल्यावर गैरसोय होत असल्याने आजी माजी सैनिक सेवा कल्याणकारी संस्थेच्या माध्यमातून अध्यक्ष वाय.सी.जाधव, उपाध्यक्ष नामदेव उतेकर, सचिव परशुराम दरेकर, खजिनदार श्रीकांत पवार, सल्लागार श्रीपत जगदाळे व दत्ताराम मोरे यांनी आ.गोगावले यांच्याकडे पाठपुरावा केला आणि त्यास प्रतिसाद म्हणून आ.गोगावले यांनी राज्यसरकारकडून भरीव निधीची तरतूद करून आणली असून लवकरच या विश्रामगृहाचे भुमिपूजन आयोजित करण्यात येणार असल्याचे आजी माजी सैनिक सेवा कल्याणकारी संस्थेच्या पदाधिकाऱ्यांनी प्रस्तुत प्रतिनिधीस सांगितले.