रायगड जिल्ह्याचे शेवटचे टोक असलेल्या पोलादपूर स्थानकात भरदुपारी बस गाडया लावायला जागा नसल्याने अनेक गाडया प्रवेशद्वाराद्वाराजवळ उभ्या राहतात तर अनेकदा गाडया स्थानकात न शिरता बाहेरच्या बाहेर मार्गस्थ होत असल्याचे वास्तव समोर आले आहे. या बसस्थानकाचे नव्याने काम करण्यात येणार असल्याने प्रवेशद्वाराच्या बाजूला नव्या शेडचे काम करण्यात आले आहे. परिणामी,स्थानक परिसरात धूळ उडत आहे त्यातच नव्याने बांधण्यात आलेल्या स्वच्छतागृहाची तावदाने अद्याप काचेविनाच आहेत. त्यामुळे महिला व पुरूष प्रवाशांची कुचंबणा होत आहे. दरम्यान, स्थानिक लोकांच्या जमिनीवर या एसटी बसस्थानकाचे अतिक्रमण झाले असल्याचे वेळोवेळी जमिनमालकांच्या वारसांकडून आमसभा तसेच महसूल प्रशासनाकडे दाद मागून लक्ष वेधण्यात आले असूनही नव्याने एस.टी.बसस्थानकाचे बांधकाम करण्यासाठी निविदा काढून काम सुरू केल्याने न्यायालयामध्ये संबधित मालक दाद मागण्याच्या पवित्र्यात आहेत.
प्रवासी वर्गाच्या सेवेसाठी तत्पर असलेली महाराष्ट्र राज्य मार्ग परिवहन महामंडळाच्या एसटी बसेस गावागावात धावत असल्यातरी काही लांबपल्याच्या गाडया लोकल गाडयाच्या प्रमाणात धावत असल्याने प्रवासी वर्गाला नियोजित वेळेत पोहोचणे कठीण होत आहे. त्यातच पोलादपूर बसस्थानकामध्ये गाडी उभी करण्याच्या जागेअभावी वेळ वाया जात असल्याने प्रवासी वर्गाचा हिरमोड होत आहे. सणासुदीच्या काळात जादा गाडया कोकणात व मुंबई ठाणे कडे मार्गस्थ होत असतात. या गाडयांतील प्रवासी पोलादपूर स्थानकात चहा नाश्ता घेऊन पुढील प्रवासाला जात असतात. यामुळे भरदुपारी ग्रामीण भागात जाणाऱ्या स्थानिक आगाराच्या गाडयांसह इतर आगाराच्या गाडया एकाच वेळी येत असल्याने गाडया स्थानकात उभ्या करण्यासाठी अपुरी जागा असल्याने किंवा मिळेल त्याजागी गाडया लावल्याने अनेक गाडया मुख्य प्रवेशद्वाराजवळ उभ्या केल्या गेल्याचे दिसून येते.
रायगड जिल्ह्यातील ऐतिहासिक ठिकाण असलेल्या व मुंबई गोवा महामार्गावर वसलेल्या महाड आगाराचा कारभार सुरू होऊन 71 वर्षापूर्वी विविध मार्गावर गाडया सुरू करण्यात आल्या. या वेळी महाड आगाराच्या अधिपत्याखाली माणगांव, पोलादपूर, गोरेगांव व आंबेतच्या बस स्थानकांचा समावेश होता. माणगांव स्थानकाचे आगारात रूपांतर झाल्यानंतर महाड आगारांतर्गत फक्त पोलादपूर स्थानक आहे. मात्र, पोलादपूरचे हे स्थानक चार शेतकऱ्यांच्या जमिनीवर उभारण्यात आले असून सर्वाधिक जमीन सुंदर गणपत सोनार उर्फ पालकर यांच्या जमिनीपैकी बेकायदेशीर मालकी हस्तांतरणाने एसटी महामंडळाकडे भुमिअभिलेख विभागाच्या मिळकतपत्राने आली असल्याचे दिसून आले आहे. या सुंदर गणपत सोनार उर्फ पालकर यांच्या मुलाच्या पानस्टॉलचा परवाना रद्द करताना महामंडळाकडे जमिनीच्या मालकीचा पुरावा नसल्याचे दिसून आले होते.
मुंबई गोवा राष्ट्रीय महामार्गाच्या चौपदरीकरणावेळी शेतजमिनमालक सुंदर गणपत सोनार उर्फ पालकर यांच्या वारसाने एस.टी.स्थानकातील जमिनीचे भूसंपादन करण्यास तसेच एस.टी.महामंडळाला कोणताही मोबदला देण्यास हरकत घेताना महाड तहसिल कार्यालयांतर्गत पोलादपूरचे महालकरी यांना असे वाटते की यापुढे या चार शेतकऱ्यांच्या जमिनी बॉम्बे स्टेट ट्रान्सपोर्ट नावाने ओळखल्या जातील, असा फेरफार करून हुकूम पारित केला आहे. भारतातील जमिनीचे मालकी हस्तांतरण करण्याच्या कायदेशीर बाबींमध्ये आयुक्तांनादेखील अशाप्रकारे बेकायदा मालकी हस्तांतरण करण्याचा अधिकार नसल्याने पोलादपूरच्या एस.टी.स्थानकाची जमिन मूळ मालकांना हस्तांतरीत करण्याची आवश्यकता असूनही याच जमिनीवर नव्याने बसस्थानकाची इमारत बांधण्यात येण्यासाठी निविदा प्रक्रिया पूर्ण होऊन ठेकेदारामार्फत तोडकाम सुरू झाले आहे. मात्र, तत्पूर्वी स्थानकाच्या आवारात एक प्रवासी शेड बांधण्यात येऊन आधीच अपुऱ्या असलेल्या जागेमध्ये वाहनांची दाटी वाढली आहे.
पोलादपूर एसटी बसस्थानकामध्ये रत्नागिरी, आंबेजोगाई, कोल्हापूर, अक्कलकोट, तुळजापूर, मुंबई, पुणे, साताराकडे जाणऱ्या गाडयांचे प्रवासी येत असतात. पोलादपूर स्थानकासमोरील मुंबई गोवा राष्ट्रीय महामार्गाचे चौपदरीकरण अंडरपास बॉक्स कटींग पध्दतीने जमिनीखालून 32 फूट खोल झाल्याने असंख्य गाडयांना सर्व्हिस रोडवरून पुन्हा महामार्गावर जावे लागत असून स्थानकासमोरील पाच पुलांपैकी दोन पुलांवर एस.टी.गाडयांमुळे सर्व्हिसरोड बंद होऊन वाहतुकीचा खोळंबा होण्याचा प्रकार दिवसांतून अनेकदा होत असल्याचे दिसून आले आहे.
Leave a Reply
आपण हि बातमी कॉपी करू शकत नाही.
Javascript not detected. Javascript required for this site to function. Please enable it in your browser settings and refresh this page.
Discover more from Pen News
Subscribe now to keep reading and get access to the full archive.