पोलादपूर तालुक्यातील वझरवाडी-कलमवाडी स्वदेस फाऊंडेशन तर्फे झाले ‘स्वप्नातील गाव’

पोलादपूर ( शैलेश पालकर ) :

तालुक्यातील वझरवाडी ग्रामपंचायत अंतर्गत कलमवाडी हे गांव स्वदेस फाऊंडेशनतर्फे स्वप्नातील गांव जाहिर करण्यात आले.

यासंदर्भात अधिकृत घोषणा गुरूवारी स्वदेसचे संचालक राहुल कटारिया तसेच महाड व पोलादपूर वरिष्ठ व्यवस्थापक मेघना फडके, पोलादपूरचे व्यवस्थापक दिपेश जाधव, वरिष्ठ समन्वयक सुजल अहिरे यांच्यासह तहसिलदार कपिल घोरपडे, सरपंच संभाजी जाधव, गाव विकास समिती अध्यक्ष दशरथ उतेकर, उपाध्यक्षा शीतल जाधव, सचिव वैभव घोलप, संतोष घोलप, शिवाजी जाधव, राजाराम जाधव, शारदा सुतार, सविता सुतार, चंद्रकांत जाधव आणि तुर्भे बुद्रुकच्या सरपंच सुरेखा गोळे, केशव खेडेकर, वासंती पवार, संजना शिंदे यांच्या प्रमुख उपस्थितीत करण्यात आली.

याप्रसंगी प्रास्ताविकामध्ये मनिष शिंदे यांनी कलमवाडी गाव स्वच्छ, सुंदर, स्वास्थ्य, सक्षम, साक्षर या पाच सुत्रांवर काम सुरू करून स्वप्नातील गांव होण्यासाठी येणारे अडथळे व त्यावर कशी मात केली याबाबत इत्यंभूत माहिती देताना मागील तीन वर्षांपासून शासन आणि स्वदेस समन्वयामधून 1 कोटी 17 लाख 4 हजारांचा निधी खर्च झाल्याचे सांगितले. याप्रसंगी तहसिलदार कपिल घोरपडे यांच्याहस्ते गाव विकास समितीचे अध्यक्ष दशरथ उतेकर यांचा सत्कार करण्यात आला.

पोलादपूरचे व्यवस्थापक दिपेश जाधव यांनी, गाव विकास समितीचे अध्यक्ष दशरथ उतेकर यांच्या प्रयत्नांतून क्राऊड फंडींग जमा करण्यात येऊन या निधीच्या माध्यमातून अनेक कामे करण्यात आल्याची माहिती देताना कलमवाडी यापुढे 100 टक्के स्वप्नातील गांव घोषित होण्यासाठी करायच्या प्रयत्नांबाबत विवेचन केले.