पोलादपूर तालुक्यातील आख्या गावाचा शिवसेनेत जाहीर प्रवेश !

पोलादपूर ( शैलेश पालकर ) :

महाड पोलादपूर माणगांव विधानसभा मतदारसंघात सुरू असलेल्या कोटयवधी रुपयांच्या विकासकामांचा धडाका पाहून गावेच्या गावे शिवसेनेत जाहीर प्रवेश करत आहेत. अशाच प्रकारे अतिदुर्गम भागात असलेल्या ओंबळी गावाकडे जाणारा रस्ता हा राष्ट्रीय महामार्गाला देखील लाजवेल अशा पध्दतीत शिवसेनेच्या माध्यमातून मुख्यमंत्री एकनाथ शिंदे यांच्या नेतृत्वाखाली असलेल्या महाराष्ट्र शासनाच्या माध्यमातून महाड विधानसभा मतदारसंघात आणि खास करून पोलादपूर तालुक्यामधील दुर्गम गावात आमदार भरत गोगावले यांच्या नेतृत्वाखाली होत असलेले विकास कामे पाहून आम्ही ओंबळीकर शिवसेनेत जाहीर प्रवेश करत आहोत, असे यावेळी मुंबई, पुणे, ठाणे येथील चाकरमानी मंडळीं आणि ग्रामस्थांनी सांगितले.

महाड विधानसभा मतदार संघाचे आमदार भरतशेठ यांच्या उपस्थितीत होळी सणानिमित्त संपूर्ण ओंबळीकर ग्रामस्थ उपस्थित असताना हा शिवसेना पक्षप्रवेश घेण्यात आला. पोलादपूर तालुक्यातील पंचायत समिती आणि जिल्हा परिषदेची निर्णायक गांवाची मतपेटी आ.गोगावले यांनी पोलादपूरच्या नगराध्यक्षा व ओंबळीच्या सुनबाई सोनाली गायकवाड यांच्या उपस्थितीत सर केल्याने आगामी लोकसभा, विधानसभा निवडणूकच नव्हे तर पंचायत समितीसह जिल्हा परिषदही सोपी केली असल्याचे मत यावेळी ओंबळीतील चाकरमानी जनतेने केले आहे.

यावेळी शिवसेना प्रवेशकर्त्यांचे भगव्या पताका घालून शिवसेना पक्षात आ.गोगावले यांच्यासह उपस्थित मान्यवरांच्या उपस्थितीत स्वागत करण्यात आले. यावेळी आ.भरत गोगावले यांचाही भव्य सत्कार करण्यात आला.

या कार्यक्रमप्रसंगी सहसंपर्कप्रमुख किशोर जाधव, जिल्हा परिषद सदस्य चंद्रकांत कळंबे, तालुकाप्रमुख निलेश अहिरे, विभाग प्रमुख तसेच शिवसेना युवा सेनेचे आजी-माजी पदाधिकारी लोकप्रतिनिधी इत्यादी उपस्थित होते.