पेण पीएसएमएस इंग्रजी माध्यम शाळेच्या स्काउट-गाईड कॅम्पवर पेट्रोल बॉम्ब हल्ला; जिवीतहानी टळली

PEN न्यूज ऑनलाइन टीम : 

 पेण शिक्षण महिला समितीच्या इंग्रजी माध्यम शाळेमार्फत दि. 1 व 2 फेब्रुवारी 2025 रोजी विद्यालयाच्या मैदानावर स्काउट-गाईड शिबिराचे आयोजन करण्यात आले होते. विद्यार्थ्यांना स्वावलंबन, शिस्त आणि सामाजिक बांधिलकी शिकवण्यासाठी या शिबिराचे आयोजन करण्यात आले होते. शिबिरात विद्यार्थ्यांसाठी विविध प्रशिक्षण सत्रे, साहसी खेळ आणि नेतृत्व विकास कार्यक्रम राबवले जात होते.

मात्र, रविवार दि. 2 फेब्रुवारी 2025 रोजी पहाटे 3.50 च्या सुमारास काही अज्ञात समाजकंटकांनी या शिबिरावरील तंबूंवर तीन पेट्रोल बॉम्ब फेकून हल्ला केला. या भ्याड हल्ल्यात एक तंबू जळून खाक झाला, मात्र सुदैवाने तिथे विद्यार्थी अथवा शिक्षक नसल्याने कोणतीही जिवीतहानी झाली नाही. विद्यार्थ्यांचे आणि शाळेच्या कर्मचाऱ्यांचे प्राण वाचले ही मोठी दिलासा देणारी बाब आहे.

शाळेच्या प्रशासनाने त्वरित परिस्थिती नियंत्रणात आणत आग विझवण्याची कार्यवाही केली. तसेच, या भ्याड हल्ल्याची गंभीर दखल घेत पेण पोलिस ठाण्यात तक्रार दाखल करण्यात आली आहे. पोलिस तपास सध्या सुरू असून, हल्ल्यामागील हेतू अद्याप स्पष्ट झालेला नाही.

विद्यालय प्रशासन, पालकवर्ग आणि विद्यार्थी यांनी या कृत्याचा तीव्र निषेध केला आहे. शाळेने आपल्या निवेदनात म्हटले आहे की, “हा हल्ला अतिशय भ्याड आणि निंदनीय असून, विद्यार्थ्यांच्या सुरक्षेशी खेळ करण्याचा हा प्रयत्न आम्ही सहन करणार नाही. संबंधित समाजकंटकांना लवकरात लवकर शोधून कठोर कारवाई व्हावी अशी आमची मागणी आहे.”

या घटनेनंतर पालकांमध्ये चिंता व्यक्त केली जात आहे. विद्यार्थ्यांच्या सुरक्षेसाठी शाळा प्रशासनाने अतिरिक्त खबरदारी घेण्याचा निर्णय घेतला आहे. पोलिसांनीही या घटनेची गांभीर्याने दखल घेत अधिक तपास सुरू केला असून, परिसरातील सीसीटीव्ही फुटेज आणि इतर पुरावे तपासले जात आहेत.

पेणमधील सामाजिक संस्था, नागरिक आणि पालक वर्गाने या प्रकाराबाबत संताप व्यक्त करत आरोपींना लवकरात लवकर अटक करावी अशी मागणी केली आहे. पुढील तपास सुरू असून, पोलिस लवकरच आरोपींना शोधून कठोर कारवाई करतील, अशी माहिती पोलिसांकडून देण्यात आली आहे.