पेण :
इस्लामचे धर्मगुरू मोहम्मद पैगंबर यांचा जन्मदिवस संपूर्ण जगभरात ईद-ए-मिलाद म्हणून साजरा केला जातो. यंदा रायगडमध्ये ईद-ए-मिलादची सुट्टी 16 सप्टेंबर रोजी जाहीर करण्यात आली होती. पेण शहरातील मुस्लिम समाजानेही मोठ्या उत्साहात हा सण साजरा केला. 15 आणि 16 सप्टेंबर रोजी विविध धार्मिक आणि सांस्कृतिक कार्यक्रमांचे आयोजन करण्यात आले होते.
15 सप्टेंबर रोजी खान मोहल्ला येथे लहान मुलांचे नातं पठण, प्रवचन आणि सांस्कृतिक कार्यक्रम पार पडले. त्याचप्रमाणे 16 सप्टेंबर रोजी कसाई मोहल्ला येथे मुलांच्या नातं पठण कार्यक्रमाचे आयोजन करण्यात आले. दोन्ही मोहल्ल्यात आकर्षक विद्युत रोषणाई करण्यात आली होती. यावेळी स्नेहभोजनाचेही आयोजन केले गेले.
16 सप्टेंबर रोजी मौलाना हैदरअली यांच्या मार्गदर्शनाखाली भव्य जुलूस काढण्यात आला. जुलूसमध्ये मौलाना अन्सार हजरत, हाफीजी अताऊल रहमान, मौलाना मन्सूर, मौलाना सलाउद्दीन, मौलाना फुरकान आणि मौलाना जबीर यांच्यासह खान मोहल्ला, कसाई मोहल्ला, वडगाव, अंतोरे, वडखळ आणि तालुक्यातून आलेल्या मुस्लिम बांधवांनी उत्स्फूर्त सहभाग घेतला. शांतता कमिटीचे सदस्य देखील मोठ्या संख्येने सहभागी झाले होते.
जुलूस खान मोहल्ल्यातून सुरू होऊन आझाद मोहल्ला, महावीर मार्ग आणि कसाई मोहल्ला मार्गे बाजारपेठेतून पुन्हा खान मोहल्ल्यात पोहोचली, जिथे जुलूसची सांगता करण्यात आली. यावेळी कुराणातील घोषणांचा जयघोष करत, चाँद-तारा असलेले झेंडे आणि तिरंगा फडकवत लहान मुलांपासून ते वृद्धांपर्यंत सर्वांनी सहभाग घेतला. जुलूसमध्ये सहभागी लोकांना सरबत आणि प्रसाद वाटप करण्यात आले.
कार्यक्रमाच्या यशस्वी आयोजनासाठी उपविभागीय पोलीस अधिकारी शिवाजी फडतरे, पोलीस निरीक्षक संदीप बागुल आणि शांतता कमिटी सदस्यांचे स्वागत करण्यात आले. शिवाजी फडतरे आणि शांतता कमिटी सदस्यांनी मुस्लिम समाजाला ईद-ए-मिलादच्या शुभेच्छा दिल्या.
कार्यक्रमाच्या अखेरीस फैय्याज इनामदार आणि भाऊ मुजावर यांनी तीन दिवस चाललेल्या कार्यक्रमाच्या यशस्वी आयोजनाबद्दल सर्व उपस्थित बांधवांचे आणि पोलीस अधिकाऱ्यांचे आभार मानले. मौलाना हैदरअली यांनी कुराणातील आयातांचे पठण करून कार्यक्रमाची सांगता केली.
