पुण्यात शिवशाही बसमध्ये 26 वर्षीय महिलेवर बलात्कार, सुरक्षेचा प्रश्न ऐरणीवर

PEN न्यूज ऑनलाइन टीम : 

पुण्यातील स्वारगेट एसटी डेपोमध्ये शिवशाही बसमध्ये 26 वर्षीय तरुणीवर बलात्कार झाल्याने संपूर्ण राज्य हादरले आहे. स्वारगेट हे पुण्यातील सर्वात वर्दळीचे ठिकाण असून, अशा ठिकाणी ही घटना घडल्याने महिलांच्या सुरक्षेचा प्रश्न पुन्हा ऐरणीवर आला आहे. या घटनेनंतर परिवहन मंत्री प्रताप सरनाईक यांनी कडक पावले उचलत संपूर्ण सुरक्षा व्यवस्थेचे पुनरावलोकन करण्याचे आदेश दिले आहेत. प्राथमिक कारवाईत डेपोतील 23 सुरक्षा रक्षकांना निलंबित करण्यात आले आहे.

मुख्यमंत्री देवेंद्र फडणवीस यांनी या प्रकरणाची गंभीर दखल घेतली असून, पुणे पोलीस आयुक्तांसोबत चर्चा करून जलदगतीने तपास करण्याच्या सूचना दिल्या आहेत. शिवसेना नेत्या नीलम गोऱ्हे यांनी घटनास्थळी भेट देऊन पाहणी केली आणि संबंधित अधिकाऱ्यांना आवश्यक त्या सूचनाही दिल्या. परिवहन मंत्र्यांनी स्वारगेट डेपो व्यवस्थापक आणि वाहतूक नियंत्रकांना आठ दिवसांत चौकशी अहवाल सादर करण्याचे आदेश दिले आहेत.

आरोपी जामिनावर बाहेर, शोधासाठी आठ पथक तैनात

दत्तात्रय गाडे असे आरोपीचे नाव असून, तो पूर्वीच जामिनावर बाहेर होता. पीडित महिला फलटणला जाण्यासाठी निघाली असता, तिला दुसऱ्या बसमध्ये बसवण्यात आले आणि त्यावेळी आरोपीने तिच्यावर अत्याचार केला. या घटनेनंतर पोलिसांनी तातडीने कारवाई करत आरोपीचा शोध घेण्यासाठी आठ विशेष पथक तयार केली आहेत. आरोपीवर यापूर्वी शिक्रापूर येथे गुन्हे दाखल असल्याचे उघड झाले आहे.