पांढऱ्या कांद्याच्या लागवड क्षेत्राचा विस्तार करण्यासाठी शेतकऱ्यांना सर्वोतोपारी मिळणार सहकार्य : जिल्हाधिकारी किशन जावळे

अलिबाग : 

जिल्हा नियोजन समितीने २०२४-२०२५ या वर्षासाठी मंजूर केलेल्या विशेष प्रकल्पांतर्गत बिजोत्पादन प्रक्षेत्रास जिल्हाधिकारी किशन जावळे यांनी भेट दिली आणि सविस्तर माहिती घेतली.पांढऱ्या कांद्याच्या लागवड क्षेत्राचा विस्तार करण्यासाठी शेतकऱ्यांना सर्वोतोपारी सहकार्य करण्यात येईल असे ही यावेळी सांगितले.

अलिबाग तालुक्यातील प्रकल्पातील लाभार्थी शेतकरी सतीश शाम्रराव पाटील गांव सागाव यांच्या शेतावर राबविण्यात येत असलेल्या, अलिबागचा पांढरा कांदा आपल्या विशिष्ट चवीसाठी, उत्कृष्ट गुणवत्तेसाठी आणि आरोग्यविषयक फायद्यांसाठी प्रसिद्ध आहे. या कांद्याला भौगोलिक निर्देशांक (GI) टॅग मिळाल्यामुळे त्याला राष्ट्रीय आणि आंतरराष्ट्रीय बाजारपेठेत प्रचंड मागणी आहे. मात्र, दर्जेदार बियाण्यांची मर्यादित उपलब्धता ही लागवड क्षेत्राच्या विस्तारासाठी मोठी अडचण ठरत होती. ही समस्या सोडवण्यासाठी जिल्हाधिकारी श्री. किशन जावळे यांच्या मार्गदर्शनाखाली कृषी विभागाने बियाणे उत्पादनासाठी नाविन्यपूर्ण प्रकल्प सुरू केला आहे.

हा प्रकल्प वैज्ञानिक पद्धतीने राबविला जात असून कृषी विज्ञान केंद्र आणि कृषी विभागाच्या अधिकाऱ्यांचे नियमित मार्गदर्शन दिले जात आहे. प्रकल्पाचे क्षेत्र तीन हेक्टर जमिनीवर पसरलेले असून अलिबाग तालुक्यातील अनेक गावांचा समावेश आहे. अलिबाग पांढऱ्या कांदा उत्पादक गटाच्या मदतीने २५९ शेतकऱ्यांची निवड करण्यात आली आहे. सध्या पिक ५०% फुलोऱ्याच्या टप्प्यात असून चांगल्या स्थितीत आहे. यामुळे यंदाच्या बियाणे उत्पादन हंगामात चांगले उत्पादन होण्याची अपेक्षा आहे.

ही भेट शाश्वत शेतीला चालना देण्यासाठी आणि अलिबाग पांढऱ्या कांद्याच्या लागवडीचे क्षेत्र वाढविण्यासाठी महत्त्वाचा टप्पा ठरली. यावेळी जिल्हाधिकारी श्री. जावळे यांनी शेतकऱ्यांच्या प्रयत्नांचे आणि कृषी विभागाच्या वैज्ञानिक दृष्टिकोनाचे कौतुक केले. त्यांनी शाश्वत शेतीचे महत्त्व स्पष्ट केले आणि शेतकऱ्यांना जीवामृत, बीजामृत यांसारख्या सेंद्रिय निविष्टा व जैविक उत्पादनांचा उपयोग करण्यास प्रोत्साहन दिले. मातीचा पोत सुधारण्यासाठी, पिकांचे संरक्षण करण्यासाठी आणि सुरक्षित, उच्च दर्जाच्या भाजीपाला उत्पादनासाठी हे घटक महत्त्वाचे असल्याचे त्यांनी सांगितले. तसेच, शेतकऱ्यांना अलिबाग पांढऱ्या कांद्याचे लागवड क्षेत्र दुप्पट करण्याचे उद्दिष्ट ठेवण्यास प्रवृत्त केले आणि त्यांना शासकीय पातळीवरून पूर्ण मदत मिळेल, असे आश्वासन दिले.

जिल्हाधिकाऱ्यांनी प्रकल्पाच्या प्रगतीबद्दल समाधान व्यक्त केले आणि शेतकरी व कृषी विभागाच्या संयुक्त प्रयत्नांचे कौतुक केले. शेतकऱ्यांनी सेंद्रिय शेती पद्धती अवलंबून उत्पादनाची गुणवत्ता सुधारावी आणि टिकाऊ शेती साधावी, असा सल्लाही त्यांनी दिला. बियाणे उत्पादन तंत्र सुधारण्यासाठी त्यांनी तांत्रिक मार्गदर्शनही केले आणि शेतकऱ्यांनी प्रकल्पाचा अधिकाधिक फायदा घ्यावा, असे आवाहन केले.

यावेळी जिल्हा अधीक्षक कृषी अधिकारी रायगड वंदना शिंदे, उपविभागीय कृषी अधिकारी अलिबाग कैलास वानखेडे, उपसंचालक कृषी प्रविण ठिगळे, तालुका कृषी अधिकारी तन्मय भगत, मंडळ कृषी अधिकारी नागाव मोहन सूर्यवंशी, कृषी सहाय्यक प्रल्हाद बनबरे आणि नितल ढोक उपस्थित होते. प्रगतशील शेतकऱ्यांनीही चर्चेत सहभाग घेतला आणि प्रकल्पाच्या यशस्वितेबाबत विचार मांडले.या वेळी सतीश कृष्णा म्हात्रे, संदीप वामन वाडेकर, स्वप्नील पांडुरंग पाटील शेतकरी हजर होते.

या भेटीमुळे शेतकऱ्यांमध्ये नवीन प्रेरणा निर्माण झाली आहे. जिल्हाधिकारी श्री. जावळे यांच्या मार्गदर्शनाने आणि पाठिंब्याने शेतकरी प्रकल्प यशस्वी करण्यासाठी अधिक आत्मविश्वासाने काम करत आहेत. या प्रकल्पातून तयार होणाऱ्या बियाण्यांच्या मदतीने कृषी विभाग अलिबाग पांढऱ्या कांद्याच्या लागवड क्षेत्राचा विस्तार करणार आहे, ज्यामुळे शेतीतील उत्पन्न वाढणार आहे. तसेच, सेंद्रिय निविष्टांचा वापर केल्यामुळे उत्पादनाच्या गुणवत्तेत लक्षणीय सुधारणा होईल.

जिल्हाधिकारी किसान जावळे यांच्या या भेटीने कृषी नवोपक्रम व शाश्वत शेतीला चालना देण्याचा प्रशासनाचा दृष्टीकोन अधोरेखित केला. त्यांच्या प्रोत्साहनाने आणि पाठिंब्याने शेतकरी प्रकल्पाच्या उद्दिष्टांसाठी अधिक जोमाने काम करतील. शेतकरी आणि कृषी विभागाच्या संयुक्त प्रयत्नांमुळे शेती विकासात चांगली प्रगती होऊ शकते, हे या प्रकल्पाने दाखवून दिले आहे. GI टॅग असलेला अलिबाग पांढरा कांदा मोठ्या प्रमाणात प्रभाव टाकण्यास सज्ज आहे. योग्य मार्गदर्शन आणि पाठिंब्याने हा उपक्रम अलिबाग तालुक्यातील शेती क्षेत्रासाठी सकारात्मक बदल घडवून आणणार आहे.