पनवेलमध्ये उ.बा.ठा, काँग्रेसला धक्का; पदाधिकार्‍यांचा शिवसेनेत जाहीर प्रवेश

पनवेल :

विधानसभा निवडणुकांपासून शिवसेना शिंदे गटाची राज्यभर घोडदौड सुरू असून पनवेलमध्ये उद्धव बाळासाहेब ठाकरे गटाचे उपशहरप्रमुख सुजन मुसलोंडकर, राहुल गोगटे यांनी महानगरप्रमुख प्रथमेश सोमण यांच्या नेतृत्वात मुक्तागिरी बंगल्यावर शिवसेनेत जाहीर प्रवेश केला.

राज्याचे उपमुख्यमंत्री एकनाथ शिंदे यांनी स्वतः त्यांचे पक्षात स्वागत केले तर यापूर्वी म्हणजे १५ फेब्रुवारी रोजी काँग्रेस प्रदेश कमिटीचे उपाध्यक्ष व पनवेल मधील अनुभवी नेते मल्लिनाथ गायकवाड यांनी भरत पाटील, सचिन गायकवाड, अशोक खरात यांच्या सह सोमण यांच्या पुढाकारात खासदार श्रीरंग आप्पा बारणे यांच्या वाढदिवसाच्या दिवशी शिवसेनेत जाहीर प्रवेश केला व २७ फेब्रुवारी रोजी राज्याचे उपमुख्यमंत्री एकनाथ शिंदे यांची भेट घेतली. शिंदे यांनीही गायकवाड यांचे पक्षात स्वागत केले.

यावेळी गायकवाड यांनी सिडको व सहकार क्षेत्राशी संबंधित विविध मागणी पत्र व निवेदने एकनाथ शिंदे यांना सादर केली. याच कार्यक्रमात महिला जिल्हा संघटिका रीना पाटील, विधानसभा संघटिका यशोदा गायकवाड, तालुकाप्रमुख मंदा जंगले यांच्या पुढाकाराने खारघर परिसरातील शेतकरी कामगार पक्ष व मनसेच्या लता टीके, इंदुताई वीर, सविता पाडेकर, आशा ठोमके, श्वेता पालवणकर, सुरेखा काळभोर, गौरी काथार, रितू मेश्राम यांसह धर्मवीर सेनेच्या प्रियांकाकडे यांच्या नेतृत्वात भारतीय जनता पक्षाच्या युवा मोर्चाचे पनवेल सचिव अक्षय साळवे यांनीही शिंदे यांच्या उपस्थितीत पक्षात प्रवेश केला.

विविध पक्षाच्या पदाधिकाऱ्यांनी केलेल्या प्रवेशामुळे शिवसेनेला निश्चित बळकटी प्राप्त होईल असे मत संपर्कप्रमुख राजेंद्र यादव व डॉ. शिल्पाताई देशमुख यांनी व्यक्त केले.